چیئرمین بلاول بھٹو زرداری نے کہا ہے کہ قیام امن کے لئے اپنی جانوں کی قربانی دینے والے شہید سپاہی قوم کے ہیرو ہیں۔

اپنے ایک بیان میں چیئرمین پی پی پی بلاول بھٹو زرداری نے بلوچستان کے ضلع کیچ میں دہشت گردوں سے مقابلے میں شہید ہونے والے 10 سپاہیوں کو خراج عقیدت پیش کیا ہے۔

اپنے پیغام میں پاکستان پیپلزپارٹی کے چیئرمین بلاول بھٹو زرداری نے شہید ہونے والے سپاہیوں کے ورثاء سے افسوس کا اظہار کیا۔

بلاول بھٹو زرداری نے کہا کہ ملک دشمن عناصر بلوچستان کا امن سبوتاژ کرنے کے لئے سرگرم عمل ہیں، سیکیورٹی فورسز کی کارروائیاں قابل تعریف ہیں۔

چیئرمین پی پی پی بلاول بھٹو زرداری کا مزید کہنا تھا کہ بلوچستان میں قیام امن کے لئے اپنی جانوں کی قربانی دینے والے شہید سپاہی قوم کے ہیرو ہیں، دہشت گردوں سے مقابلے کے دوران شہید ہونے والے سپاہیوں کی قربانی رائیگاں نہیں جائے گی۔

واضح رہے اس سے قبل پاک فوج کے شعبہ تعلقات عامہ (آئی ایس پی آر) کے مطابق بلوچستان کے علاقے کیچ میں دہشت گردوں نے چیک پوسٹ پر حملہ کردیا جس کے نتیجے میں 10 جوان شہید ہوگئے۔

ترجمان پاک فوج کے مطابق فائرنگ کے تبادلے میں ایک دہشت گرد مارا گیا جب کہ کئی زخمی ہوئے۔

آئی ایس پی آر کے مطابق حملہ 25 اور 26 کی درمیانی شب کیا گیا۔

ترجمان پاک فوج کے مطابق کلیئرنس آپریشن کے دوران 3 دہشت گرد گرفتار کیے گئے، علاقے میں کلیئرنس آپریشن بدستور جاری ہے.

آئی ایس پی آر نے کہا کہ مسلح افواج دہشتگردوں کے خاتمے کے لیے پر عزم ہے۔