اسلام آباد، کل جماعتی حریت کانفرنس نے شہید افضل گرو اور شہید مقبول بٹ کی برسی کےموقع پراسلام آباد میں بھارتی سفارتخانہ کے باہراحتجاجی مظاہرہ کیا۔

مظاہرے میں حریت رہنماؤں سمیت مظاہرین کی بڑی تعداد نے شرکت کی۔ مظاہرین نے بھارت مخالف اور آزادی کے حق میں نعرے بازی کی۔

اس موقع پرمقررین کا کہنا تھا کہ بھارت کشمیر میں انسانیت سوز مظالم کررہا ہے۔ بھارت ظلم و جبر کے ذریعے کشمیریوں کے جذبہ حریت کو دبا نہیں سکتا۔ حریت قائدین سے خوفزدہ بھارت نے ریاستی جبر کی مثال قائم کرتے ہوئے  قائدین کو جیلوں میں قید یا گھروں میں نظر بند کیا ہوا ہے۔

بھارتی قابض فوج افضل گرو و مقبول بٹ کی طرح دیگر حریت قائدین کو بھی قتل کرنا چاہتی ہے۔

ان کا مزید کہنا تھا کہ کشمیری عوام خون کے آخری قطرے تک آزادی کیلئے لڑیں گے۔ کشمیری قوم شہدائے کے خون کو رائیگان جانے نہیں دے گی۔

عالمی برادری کشمیر میں جاری مظالم کا نوٹس لے۔اقوام متحدہ اپنی قراردادوں کے مطابق کشمیریوں کو استصواب رائے کا حق دلوانے میں اپنا کردار ادا کرے۔

یادرہے، کشمیرکی آزادی کی تحریک چلانےپربھارت کی جانب سے مقبول بٹ کو 11 فروری 1984 کو نئی دہلی کی تہاڑ جیل میں پھانسی دی گئی تھی اورانہیں جیل کےاحاطےمیں ہی دفن کردیاتھا۔