یورپی بحیرہ روم کے زلزلہ پیما مرکز نے اپنے ایک بیان میں کہا ہے کہ افغانستان میں ہندوکش کے علاقے میں 5.7 کی شدت کا زلزلہ ریکارڈ کیا گیا۔

ادارے نے اعلان کیا کہ زلزلے کا مرکز 209 کلومیٹر کی گہرائی میں تھا۔ تاہم افغانستان میں آنے والے اس زلزلے میں کسی جانی یا مالی نقصان کے بارے میں کوئی بیان جاری نہیں کیا گیا۔

دوسری جانب آج صبح مردان، ملاکنڈ، چترال اور خیبر پختونخوا صوبے کے مختلف علاقوں میں زلزلے کے جھٹکے محسوس کئے گئے۔

جبکہ زلزلے کی وجہ سے مقبوضہ کشمیر کے ضلع بڈگام کے علاقے چرار شریف میں واقع شیخ العالم شیخ نورالدین نورانی کے مزار کا مینار ایک طرف جھک گیا، لیکن مزار شریف کو کوئی بڑا نقصان نہیں ہوا ۔

صبح پاکستان، بھارت اور مقبوضہ جموں و کشمیر کے مختلف علاقوں میں آنے والے زلزلے کی شدت 5.9 ریکارڈ کی گئی ہے۔

خیال رہے کہ 11 مئی 1995 کو کشمیری مجاہد مست گل اور ان کے ساتھیوں نے درگاہ چرار شریف کا محاصرہ کرنے والے بھارتی فوجیوں سے شدید جھڑپ کی تھی اور بحفاظت لائن آف کنٹرول عبور کر کے آزاد کشمیر پہنچ گئے تھے۔

اب تک کی اطلاعات کے مطابق پاکستان ڈیزاسٹر مینیجمنٹ اتھارٹی ( پی ڈی ایم اے ) کے کنڑول روم کو کسی قسم کی جانی یا مالی نقصان کی اطلاع موصول نہیں ہوئی۔

ڈی جی پی ڈی ایم اے کا کہنا ہے کہ تمام ضلعی انتظامیہ کے ساتھ مسلسل رابطے میں ہیں۔ پی ڈی ایم اے کا کنٹرول روم مکمل فعال ہے. عوام کسی بھی نا خوشگوار واقعے کی اطلاع ہماری ہیلپ لائن 1700 پر دیں۔