مٹر ایک ایسی سبزی ہے جو نہ صرف ذائقے میں مزیدار بلکہ غذائیت سے بھی مالامال ہے۔

مٹر سب سے مشہور دیسی سبزیوں میں سے ایک ہے ہرے ہرے یہ مٹر سب ہی کو پسند ہوتے ہیں اور سب اسے شوق سے کھاتے ہیں، اگرچہ مٹر سردیوں کی سبزی ہے لیکن آج کل یہ سال بھر دستیاب رہتی  ہے۔

ماہرین کا کہنا ہے کہ مٹر کے استعمال سے ذیابطیس کو کنٹرول کیا جا سکتا ہے۔

ذیابطیس کیا ہے؟

ٹائپ 2 ذیابیطس ایک ایسی حالت ہے جو بلڈ شوگر لیول کو متاثر کرتی ہے، اس حالت میں، مریض کا جسم یا تو ہارمون انسولین پیدا نہیں کرتا یا وہ انسولین کے اثرات کے خلاف مزاحمت کرتا ہے، جس کی وجہ سے وہ خون میں شوگر لیول کو کنٹرول کرنے سے قاصر رہتا ہے۔

ذیابطیس کی علامات

ٹائپ 2 ذیابیطس کی کچھ علامات میں پیاس لگنا، بار بار پیشاب کرنے کی خواہش، بھوک، تھکاوٹ اور بصارت کا دھندلا پن شامل ہیں، اس حالت کو دواؤں، ورزش اور صحت مند غذا کے استعمال کے ذریعے منظم کیا جا سکتا ہے، ٹائپ 2 ذیابیطس کے مریض کے لیے صحت بخش غذا کا استعمال کرنا بہت ضروری ہے، جو خون میں شوگر کی سطح میں اچانک اضافے کو روک سکے۔

 یہی وجہ ہے کہ ذیابیطس کے مریضوں کو چاہیے کہ وہ اپنی پلیٹ میں موجود ہر کھانے کا بغور جائزہ لیں اور ایسی غذاؤں کے استعمال سے گریز کریں جن میں بلڈ شوگر بڑھانے کی خصوصیات ہوں اوراپنی پلیٹ میں مزید ایسی غذائیں شامل کریں جو بلڈ شوگر کو کنٹرول کرتی ہیں جیسے کہ مٹر۔

شوگر کے مریضوں کے لئے مٹر کے فوائد

مٹر میں موجود غذائیت

فائبر کی وافر مقدار

فائبر ہماری مجموعی صحت کے لئے بےحد ضروری ہے، 100 گرام مٹر میں 14 گرام کاربوہائیڈریٹ اور 5 گرام فائبر ہوتا ہے، جو ذیابطیس کے مریضوں کے لئے انتہائی اہم ہے۔

پروٹین کی وافر مقدار

100 گرام مٹر میں 5 گرام پروٹین ہوتا ہے، پروٹین کا استعمال اضافی بھوک کا خاتمہ کرتا ہے اور یوں وزن کم کرنے میں مدد ملتی ہے اس لئے مٹر کا استعمال ذیابطیس کو کنٹرول کرنے اور وزن کم کرنے دونوں کے لئے مفید ہے۔

کیلوریز میں کم

ماہرین کے مطابق 100 گرام مٹر میں صرف 80 کیلوریز ہوتی ہیں، کم کیلوریز والی غذائیں شوگر کے مریضوں کے لئے فائدے مند ثابت ہوتی ہیں کیونکہ کیلوریز کے زائد استعمال سے موٹاپے کا شکار ہونے کا خدشہ ہوتا ہے اور موٹاپا ٹائپ 2 ذیابطیس میں مبتلا ہونے کی وجہ بنتا ہے۔

پوٹاشیم کی وافر مقدار

بلڈ پریشر کی سطح کو کنٹرول میں رکھنے کے لیے پوٹاشیم انتہائی اہم ہے۔ پوٹاشیم کی کمی ذیابیطس کے خطرے کو بڑھا سکتی ہے اور اس لیے یہ منرل ان لوگوں کے لیے بےحد اہم ہے جو ذیابطیس کا شکار ہیں، مٹر میں 244 ملی گرام  پوٹاشیم ہوتا ہے، جو ذیابطیس کے مریضوں کے لئے بہترین ہے،

ذیابیطس کے مریض چاولوں، سلاد، ناشتے کے آملیٹ اور پاستا میں مٹر شامل کر سکتے ہیں۔