شہباز گِل نے کہا ہے کہ وزیراعظم عمران خان نے اسلاموفوبیا کا مقدمہ عالمی فورمز پر لڑا۔

اپنے ایک بیان میں وزیراعظم کے معاون خصوصی برائے سیاسی ابلاغ ڈاکٹر شہباز گِل نے کہا کہ تقریباً 2 دھائیوں بعد پاکستان کا دورہِ روس ممکن ہوا، اس سے قبل جو دورے ہوئے وہ خالصتاً دوطرفہ نہیں تھے۔

انہوں نے کہا کہ ماضی اور اب کے روس میں زمیں آسمان کا فرق ہے، دورِ حاضر کے روس کی سیاسی اور معاشی تعلقات میں بہتری آئی ہے۔

معاون خصوصی برائے سیاسی ابلاغ کا کہنا تھا کہ روس کے چین کے ساتھ بہتر معاشی اور سیاسی اتحاد ہے جبکہ دوسری طرف پاکستان بھی چین کا بہترین اتحادی ہے۔

شہباز گِل نے کہا کہ وزیراعظم عمران خان نے اسلاموفوبیا کا مقدمہ عالمی فورمز پر لڑا جبکہ عمران خان پہلے مسلمان حکمران ہیں جنہوں نے مغرب کو مسلمانوں کے جذبات سے مؤثر طریقے سے آگاہ کیا۔

وزیراعظم کے معاون خصوصی برائے سیاسی ابلاغ ڈاکٹر شہباز گِل کا مزید کہنا تھا کہ صدر پیوٹن کا اسلاموفوبیا پر بیان خوش آئند ہے، آنے والے وقت میں پاکستان اور روس کے بہتر سے بہترین ہوں گے۔