ویسٹ انڈیز کے مایہ ناز آل راؤنڈر کارلوس بریتھ ویٹ نے اپنی نومولود بیٹی کا نام ایک کرکٹ اسٹیڈیم کے نام پر رکھ دیا۔

بیٹی کا نام کرکٹ اسٹیڈیم کے نام پر رکھنے کی وجہ ظاہر ہے 2016 میں ٹی ٹوئنٹی ورلڈ کپ کا فائنل میچ تھی جو بھارت کے شہر کولکتہ میں کھیلا گیا تھا۔

یہ فائنل کارلوس کے نام سے کرکٹ کی تاریخ میں ہمیشہ کے لئے امر ہو گیا ہے، جس میں کارلوس بریتھ ویٹ کے چار چھکوں کی گونچ کئی ماہ تک سنائی دیتی رہی تھی۔

ویسٹ انڈیز کی ٹیم 2016 کے ٹی ٹوئنٹی ورلڈ کپ کے فائنل میچ میں انگلینڈ کے مد مقابل تھی، ویسٹ انڈیز کو آخری اوور میں 19 رنز درکار تھے۔

انگلینڈ کی جانب سے اختتامی اوور کرانے کی ذمہ داری بین اسٹوکس کی تھی، جن کی ابتدائی چار گیندوں پر کارلوس بریتھ ویٹ نے چار چھکے لگا کر ویسٹ انڈیز کو دوسری بار ٹی ٹوئنٹی ورلڈ جتوا دیا تھا۔

آل راؤنڈر کارلوس بریتھ ویٹ کے ہاں اتوار کے دن بیٹی کی پیدائش ہوئی ہے۔

کارلوس بریتھ ویٹ نے گزشتہ روز سماجی رابطے کی ویب سائٹ پر اپنی بیٹی کے ساتھ تصویر شئیر کی ہے اور کہا کہ ان بیٹی کا نام ایڈن روز بریتھ ویٹ رکھا گیا ہے۔