خوبصورتی کی رانی بالی وُڈ کی ڈانسر کوئین مادھوری ڈکشٹ نے اپنی زندگی کا ایک دلچسپ واقعہ سناکر سب کے چہرے پر مسکراہٹ بکھیر دی۔

مادھوری ڈکشٹ نے حال ہی میں معروف کامیڈین کپل شرما کے شو میں اپنی زندگی سے جڑا ایک دلچسپ واقعہ سُنایا۔

اداکارہ نے بتایا کہ کس طرح ایک شخص الیکٹریشن ہونے کے بہانے اُن کے گھر میں داخل ہوا اور جب انہوں نے اُسے جانے کے لیے کہا تو اُس نے کیا حیرت انگیز جواب دیا۔

دی فیم گیم کی پروموشن کے دوران کپل شرما کے شو میں مادھوری نے بتایا کہ ہوا کچھ یوں کہ میرے گھر کا ایک سوئچ بورڈ خراب ہوا تو فون پر الیکٹریشن کو بلوایا۔

اُن کا کہنا تھا کہ اُس سوئچ بورڈ کو درست کرنے کے لیے گھر میں 4 لوگ آگئے، ایک نے استفسار کیا کہ کونسا سوئچ بورڈ خراب ہے؟ میں نے اشارے سے اُسے بتایا، ایک نے بورڈ چیک کیا اور دوسرے نے اُسے کھول دیا اور درست کرنے میں لگ گئے۔

مادھوری نے مزید بتایا کہ جب سوئچ بورڈ ٹھیک ہوگیا تو میں نے گھر آئے لوگوں کو جانے کا کہا، تو جنہوں نے کام کیا تھا وہ مسکراتے ہوئے چل دیے۔

اداکارہ نے یہ بھی کہا کہ اُن کے پیچھے ایک آدمی رہ گیا تو اس پر میں نے اُن سے کہا کہ آپ نہیں جارہے کیا ان کے ساتھ؟ تو اُس نے جواب دیا کہ ’ہم ان کے ساتھ نہیں ہیں، ہم تو آپ کو دیکھنے آئے تھے‘۔

بالی ووڈ اداکارہ نے پورا واقعہ جس انداز میں سنایا، اس پر ہر کوئی ہنس پڑا۔

یاد رہے کہ مادھوری پہلی مرتبہ ویب سیریز کا حصہ بن رہی ہیں جس کی پروموشن کے لئے وہ آج کل مختلف شوز میں جا رہی ہیں۔