ڈاکٹر یاسمین راشد نے کہا ہے کہ اپوزیشن کو کبھی لانگ مارچ یا عدم اعتماد سے نہیں روکا۔

صوبائی وزیر صحت ڈاکٹریاسمین راشد نے پریس کانفرنس کرتے ہوئے کہا ہے کہ کورونا کے باعث دنیا بھر میں مہنگائی ہوئی، صحت کارڈ کے ذریعے غریبوں کو علاج کی مفت سہولت دی۔

انہوں نے کہا کہ اپوزیشن نے اگر تحریک عدم اعتماد لانی ہے تو لے آئیں۔

واضح رہے کہ وزیرداخلہ شیخ رشید احمد نے اپوزیشن کے لانگ مارچ سے متعلق بڑی پیش گوئی کی تھی۔

وزیرداخلہ نے کہا تھا کہ لانگ مارچ ہوتا دیکھ رہا ہوں لیکن اس سے نمٹنے کیلئے فی الحال کوئی حکمت عملی نہیں بنائی۔

انھوں نے کہا تھا کہ اپوزیشن کے لانگ مارچ س کیسے نمٹنا ہے یہ بعد میں دیکھیں گے۔

ان کا کہنا تھا کہ مذاکرات کیلئے نہ ہم سے کسی نے رابطہ کیا نہ ہمارا کسی سے رابطہ ہوا۔

وزیرداخلہ نے کہا تھا کہ 31 جنوری تک وزیراعظم مستعفی ہوں گے نہ اپوزیشن استعفے دے گی، ہوسکتا ہے کچھ لوگ استعفے دے دیں لیکن سارے استعفے نہیں دیں گے۔

وزیرداخلہ نے کہا تھا کہ وزیراعظم عمران خان کچھ بھی کرسکتے ہیں لیکن این آر او کسی صورت نہیں دیں گے اور نہ نیب ختم ہوگا۔

فیصلہ عمران خان نے کرنا ہے جب کریں گے تو سب کو معلوم ہوجائے گا، حکومت فی الحال اس پر کابینہ میں بحث نہیں کر رہی۔

شیخ رشید کا کہنا تھا کہ آپ دیکھیں گے یہ استعفے بھی نہیں دیں گے اور پوری امید ہے یہ سینیٹ انتخابات میں حصہ لیں گے۔

وزیرداخلہ نے مزید کہا تھا کہ لانگ مارچ اور لونگ مارچ میں فرق ہوتا ہے، اگر یہ اسلام آباد آتے ہیں تو ہم استقبالیہ کیمپ لگانے پر غور کریں گے۔