متنازع ٹک ٹاک اسٹار حریم شاہ وفاقی ایف آئی اے کو اپنے خلاف کارروائی سے روکنے پر سندھ ہائیکورٹ کی شکرگزار ہیں۔

اداکارہ حریم شاہ نے فوٹو اینڈ ویڈیو شئیرنگ ایپ انسٹاگرام پر ایک ویڈیو پوسٹ کی ہے۔

حریم شاہ کی جانب سے پوسٹ کی جانے والی ویڈیو میں دیکھا جا سکتا ہے کہ اداکارہ نے ہائیکورٹ کے اس فیصلے کے سامنے آنے کے بعد اپنے ایک بیان میں کہا کہ سندھ ہائیکورٹ نے ایف آئی اے کو ان کے خلاف کاروائی کرنے سے روک دیا ہے۔

اداکارہ  نے کہا کہ انہیں عدالتوں اور اپنے اداروں پر اعتماد ہے اور مستقبل میں بھی عدالت سے انصاف کی توقع ہے۔

حریم شاہ نے مزید کہا کہ  وہ پاکستانی حکومت اور عدالت سے پوچھنا چاہتی ہیں کہ ایف آئی اے کو یہ اختیار کس نے دیا ہے کہ وہ میری ذاتی دستاویزات میڈیا کو دے اور میرا میڈیا ٹرائل کرے۔

انہوں نے کہا کہ میں ایف آئی اے کے آگے ہاتھ جوڑتی ہوں میرا پیچھا چھوڑ دے، اگر اب ایف آئی اے نے کارروائی کی تو توہینِ عدالت ہوگی۔

حریم شاہ نے مزید کہا کہ آج میں بہت خوش ہوں اور یہ میرے شوہر بلال شاہ اور میرے وکیل منیر احمد کی کاوشوں کا نتیجہ ہے کہ مجھے بہت بڑا ریلیف ملا ہے ۔

واضح رہے کہ سندھ ہائیکورٹ نے ایف آئی اے کو ٹک ٹاکر حریم شاہ کے خلاف کارروائی سے روک دیا تھا۔