بھارت کے شہر کرناٹک کے بعد راجھستان کے شہر جے پور میں بھی مسلمان طالبات کو کالج میں داخل ہونے سے روک دیا گیا۔

یہ واقعہ جے پور کے ایک پرائیویٹ کالج میں پیش آیا جہاں آج صبح مسلمان طالبات برقعہ اور حجاب پہن کر کالج پہنچی تو کالج کے گیٹ پر روک دیا گیا۔

مسلمان طالبات نے الزام لگایا کہ کالج انتظامیہ نے انہیں ڈریس کوڈ کا حوالہ دے کر واپس گھر بھیج دیا۔

طالبات کے اہل خانہ کالچ پہنچے تو وہاں کالچ انتظامیہ اور اہل خانہ کے درمیان لفظی جنگ عروج پر پہنچ گئی، اطلاع ملنے پر پولیس بھی موقع پر پہنچ گئی۔

کالج کے سیکریٹری راجندر شرما کا کہنا ہے کہ کالج کے تمام طلباء کو ڈریس کوڈ ضابطے سے آگاہ کیا گیا تھے، آج کچھ طالبات ڈریس کوڈ میں نہیں آئیں تو انہیں واپس بھیج دیا گیا۔

طالبات کا کہنا ہے کہ انہوں نے ڈریس کوڈ کی مکمل پابندی کی ہے صرف برقعہ اور سر کو ڈھانپنے کے لئے حجاب پہنا تھا۔

غیر ملکی میڈیا کے مطابق جے پور کے پولیس اسٹیشن میں اس معاملے پر سی ایل جی کی ہنگامی میٹنگ کال کی ہے۔

پولیس اسٹیشن کے انچارج ایشونت یادیو کا کہنا ہے کہ ان کی تعیناتی اسمبلی انتخابات پر ہے لیکن جیسے ہی انہیں اطلاع ملی وہ موقع پر پہنچ گئے۔

ایشونت یادیو کا کہنا ہے کہ اس معاملے میں سمجھداری سے کام لینا ہو گا اور طالبات کے مستقبل کو دھیان میں رکھتے ہوئے اس معاملے کو دیکھنا ہو گا۔۔