پاکستان ڈیمو کریٹک موومنٹ کے سربراہ مولانا فضل الرحمان آج چوہدری برادران سے ملاقات کریں گے۔ 

ذرائع کا کہنا ہے کہ ملاقات کے دوران مولانا فضل الرحمان، چوہدری شجاعت حسین اور چوہدری پرویز الہٰی سے حکومت کا ساتھ چھوڑنے  اور وزیراعظم کے خلاف تحریک عدم اعتماد میں اپوزیشن کا ساتھ دینے کی درخواست کریں گے۔

سربراہ جے یو آئی (ف) کی جانب سے مسلم لیگ (ق) کے رہنماؤں کو پی ڈی ایم کے تحریک عدم اعتماد کے فیصلے سے متعلق آگاہ کیا جائے گا جب کہ ملاقات میں پی ٹی آئی حکومت کی کارکردگی سمیت ملکی سیاسی صورتحال کا بھی جائزہ لیا جائے گا۔

گذشتہ روز پی ڈی ایم کے سربراہ مولانا فضل الرحمان نے مسلم لیگ (ن) کے صدر شہباز شریف سے ان کی رہائش گاہ پر ملاقات کی۔ اس دوران مسلم لیگ (ن) کی نائب صدر مریم نواز اور لیگی رہنما بھی موجود تھے۔

شہباز شریف نے مولانا فضل الرحمان کو پی پی قیادت سے ہونے والی بات چیت سے آگاہ کرتے ہوئے بتایا کہ (ن) لیگ اور پیپلز پارٹی نے تحریک عدم اعتماد پر اتفاق کیا ہے۔