خیبرپختونخوا فوڈ سیفٹی اتھارٹی کی جانب سے صوبے بھر میں ملاوٹ شدہ دودھ کے خلاف کریک ڈاؤن کیا گیا ہے۔

 تفصیلات کے مطابق موٹروے ٹول پلازہ پشاور کے قریب گاڑی سے ایک ہزار کلو سے زائد خراب پنیر برآمد کرکے تلف کیا گیا جبکہ ناکہ بندی کے دوران پانی کی ملاوٹ پر 240 لیٹر سے زائد ناقص دودھ بھی موقع پر تلف کردیا گیا ہے۔

 فوڈ سیفٹی اتھارٹی حکام کا کہنا ہے کہ ڈی آئی خان میں بھی دریا پل پر ناکہ بندی کرکے مختلف گاڑیوں سے 500 لیٹر سے زائد ملاوٹ شدہ دودھ تلف کردیا گیا ہے۔

فوڈ سیفٹی اتھارٹی حکام نے بتایا کہ پانی کی ملاوٹ ثابت ہونے پر سوات میں بھی 400لیٹر سے زائد ناقص دودھ تلف کردیا گیا ہے۔

اسکے علاوہ  مانسہرہ اور بنوں میں بھی دودھ سپلائی کرنے والے ٹینکرز اور دیگر گاڑیوں کا معائنہ کرکے دودھ میں ملاوٹ پر بھاری جرمانے عائد کیے گئے۔

واضح رہے کہ انسپکشن کے دوران محکمہ لائیو اسٹاک کے ملک ٹیسٹنگ لیبارٹری سے دودھ کے نمونوں کا جائزہ لیا گیا۔