نواز شریف کی ضمانت کے معاملے پراٹارنی جنرل  کی جانب سے لکھے گئے خط کو شہباز شر یف نے توہین عدالت قرار دے دیا۔ 

قومی اسمبلی میں اپوزیشن لیڈر اور مسلم لیگ ن کے صدرشہباز شریف نے اٹارنی جنرل کے خط کا جواب دیتے ہوئے کہاکہ نوازشریف کی میڈیکل رپورٹس رجسٹرار لاہور ہائی کورٹ کے پاس جمع کروا چکا ہوں۔

انہوں نے کہاکہ میں نے کبھی بھی حلف نامے یا ضمانت کی خلاف ورزی نہیں کی، مجھے آپ کا خط بھجوانا غیر قانونی، غیر ضروری اور ناجائز ہے، اس خط کے سیاسی مقاصد ہیں۔

 شہبا زشریف نے کہاکہ خط کے مندرجات کی روشنی میں اپنے حقوق کا تحفظ کرنے کا حق رکھتا ہوں، اس خط کی بنیاد پر میرے خلاف توہین آمیز اور بے بنیاد مہم چلائی گئی۔

یہ بھی پڑھیں: دل کے متوقع دورے کے باعث پاکستان نہ آنے والے نواز شریف کا لندن میں فیکٹری کا دورہ

اپوزیشن لیڈر کا کہنا ہےکہ وفاقی کابینہ کی ہدایت پر لکھا گیا خط شریف خاندان کے میڈیا ٹرائل کی کوشش ہے، خط عدالتوں میں زیر التواء مقدمات پر اثر انداز ہونے کی کوشش ہے، اسلام آباد ہائیکورٹ میں زیر سماعت معاملے پر خط لکھ کر توہین عدالت کی گئی۔

مسلم لیگی رہنما نے کہاکہ خط لکھتے ہوئے عدالتی حکم کر نظر انداز کیا گیا، نواز شریف کی میڈیکل رپورٹس باقاعدگی سے جمع کروائی جاتی رہی ہیں۔

ذرائع کے مطابق اٹارنی جنرل آفس کو خط شہباز شریف کے پرسنل سیکرٹری مراد علی شاہ نے بھجوایا۔

اٹارنی جنرل کیجانب سے شہباز شریف کو لکھے گئے خط میں کیا کہا گیا؟

واضح رہے کہ اٹارنی جنرل خالد جاوید کی جانب سے مسلم لیگ ن کے قائد نواز شریف کی واپسی کے ضامن شہباز شریف کو خط لکھا گیا تھا۔

خط میں لاہور ہائیکورٹ میں دی گئی گارنٹی کا حوالہ دیتے ہوئے کہا گیا کہ لاہور ہائیکورٹ نے طبی بنیاد پر نوازشریف کو 4 ہفتے کیلئے ملک سے باہرجانے کی اجازت دی تھی۔

خط میں کہا گیا نواز شریف کو طبیعت صحیح ہونے پر واپس آنا تھا، آپ نے انہیں واپس لانے کی تحریری یقین دہانی کرائی تھی اور رجسٹرارکو تسلسل سے میڈیکل رپورٹ جمع کرانا تھی، انڈر ٹیکنگ خلاف ورزی پر آپ کیخلاف ہائیکورٹ رجوع سے پہلے خط لکھ رہے ہیں۔

اتارنی جنرل نے خط میں یہ بھی کہا تھا کہ خط ملنے کے 10 دن میں نوازشریف کی میڈیکل رپورٹس جمع کرائیں، ورنہ آپ کیخلاف لاہورہائیکورٹ سے رجوع کریں گے۔