بل گیٹس کا کہنا ہے کہ کورونا کے بعد دنیا کو جلد ایک اور ہلاکت خیز وبائی مرض کا سامنا ہوسکتا ہے۔

مائیکرو سافٹ کے بانی بل گیٹس نے ایک انٹرویو میں کہا ہے کہ کورونا وائرس کے بعد دنیا کو جلد ایک اور خطرناک اور ہلاکت خیز وبائی مرض کا سامنا کرنا پڑ سکتا ہے لیکن اگر ابھی سے تیاری کی جائے تو آنے والی وبا سے بچا جا سکتا ہے۔

موجودہ وبا کے حوالے سے مائیکرو سافٹ کے بانی بل گیٹس نے اطمینان کا اظہار کیا اور بتایا کہ کورونا کے بدترین اثرات ختم ہو رہے ہیں کیونکہ آبادی کے بڑے حصے میں اس مہلک وائرس کے خلاف قوت مدافعت پیدا ہو گئی ہے اور اب وہ اس کا مقابلہ کر سکتے ہیں۔

ان کا مزید کہا کہ نئی اومیکرون کی شدت میں بھی کافی کمی آئی ہے اور یہ اتنا ہلاکت خیز بھی ثابت نہیں ہوا جس سے یہ بات واضح ہوئی کہ کورونا کے خلاف سماج میں مدافعت پیدا ہوگئی ہے۔

لیکن اس انٹرویو میں بل گیٹس نے ایک اور پیشگوئی کرتے خبردار کیا کہ دنیا کو جلد نئی وبا کا سامنا ہوسکتا ہے۔

دنیا بھر میں پولیو مہم چلانے والے بل گیٹس نے نئی وبا کا مقابلہ کرنے کے لیے یہ اُمید بھی ظاہر کی ہے کہ اگر ابھی سے تحقیق اور تیاری کی جائے تو جلد آنے والی اس وبا سے لڑنا ممکن ہوگا اور دنیا اس سے بھی نمٹ سکتی ہے۔

بل گیٹس نے یہ بھی بتایا کہ کورونا وبا کے باعث شدید بیماری کے خطرات جو بنیادی طور پر بڑھاپے، موٹاپے یا ذیابیطس کے ساتھ منسلک ہوتے ہیں اب اس کے امکانات ڈرامائی طور پر کم ہوتے جا رہے ہیں۔