تنویر الیاس خان نے کہا ہے کہ تنازعہ کشمیر برطانیہ کا چھوڑا ہوا مسئلہ ہے۔

قانون ساز اسمبلی کے یوم یکجہتی کشمیر کے حوالے سے اجلاس  سے خطاب کرتے ہوئے صدر پی ٹی آئی آزاد کشمیر سردار تنویر الیاس خان نے کہا کہ کشمیریوں سے اظہار یکجہتی پر  پاکستان کی حکومت، افواج اور عوام کے بے حد شکرگزار ہیں۔

آزاد کشمیر کی آزادی کے لئے چپے چپے کو خون سے نہلا یا گیا، ہندوستان کی اسٹبلشمنٹ کو یہ سمجھنا چاہیےکہ خطے میں ہندو توا کا نظریہ کا میاب نہیں ہو سکتا۔

تنویر الیاس خان نے کہا کہ تنازعہ کشمیر برطانیہ کا چھوڑا ہوا مسئلہ ہے، برطانوی حکومت مسئلہ کشمیر کو کشمیری عوام کی خواہشات اور اقوام متحدہ کی قراردادوں کے مطابق حل کروا کر اپنی اخلاقی ذمہ داریاں پوری کرے۔

صدر پی ٹی آئی آزاد کشمیر سردار کا کہنا تھا کہ مقبوضہ کشمیر کے عوام کو یقین دلاتے ہیں کہ پاکستان آزاد کشمیر اور مقبوضہ کشمیر ایک ہی جسم کے مختلف حصے ہیں۔

انہوں نے کہا کہ ہم مقبوضہ کشمیر کے عوام کو کہنا چاہتے ہیں جو قیامت آپ پر ڈھائی جا رہی ہے ہم اس کا مکمل ادراک رکھتے ہیں۔

تنویر الیاس خان نے یہ بھی کہا کہ مقبوضہ کشمیر کے عوام کو یقین دلاتے ہیں کہ آپ کی آزادی اور حق خودارادیت تک اپنی سیاسی اور سفارتی جدوجہد جاری رکھیں گے۔

صدر پی ٹی آئی آزاد کشمیر سردار تنویر الیاس خان کا مزید کہنا تھا کہ پانچ اگست کے بعد عالمی سطح پر کشمیریوں کے لئے کئی نئے دروازے کھلے ہیں جن سے استفاد ہ کرنے کی ضرورت ہے۔