لاپتا افراد کا فوری سراغ لگانے کے لیے ضلعی سطح پر ٹاسک فورس کے قیام کے معاملے پرایڈووکیٹ جنرل سندھ نے ٹاسک فورس کی تشکیل سے متعلق ڈرافٹ عدالت میں پیش کردیا۔ 

تفصیلات کے مطابق ایڈووکیٹ جنرل سندھ  عدالت سے کہا کہ انفورس ڈس اپرینس ٹاسک فورس کے نام سے ضلعی سطح پر ٹاسک فورس تشکیل جارہی ہے۔

جسٹس محمد اقبال کلہوڑو نے ریمارکس میں کہا کہ نئی ٹاسک فورس کے قیام سے متعلق ڈرافٹ کا پہلےعدالت خود جائزہ لے گی۔ عدالت جائزہ لینے کے بعد ضلعی سطح پر ٹاسک فورس کی تشکیل کی منظوری دے گی۔

عدالت نے ضلعی سطح پر ٹاسک فورس کے قیام کے معاملے پر ریمارکس دیے کہ منظوری کے بعد ہی حکومت اور پولیس نئی ٹاسک فورس کے مطابق عملدرآمد شروع کرے۔ ضلعی ٹاسک فورس کا مقصد جلد لاپتا افراد کا سراغ لگانا ہے۔

سندھ ہائی کورٹ نے کیس کی مزید سماعت 30 مارچ تک ملتوی کردی۔

واضح رہے کہ گذشتہ روز سندھ ہائی کورٹ میں جبری گمشدہ افراد کے اہلخانہ کا معاوضہ دینے سے متعلق کیس کی سماعت کے دوران عدالت نے صوبائی حکومت سے جبری گمشدہ افراد کے اہلخانہ کو معاوضہ دینے کی پالیسی طلب کر لی۔

سندھ ہائی کورٹ نے سندھ حکومت سے 10 مارچ تک جواب جمع کرانے کی آخری مہلت دیتے ہوئے لاپتا مزید 6 افراد کی جبری گمشدگی کے تعین سے متعلق بھی رپورٹ طلب کی۔