یورپی فوجی اتحاد نیٹو نے کہا ہے کہ وہ روسی جارحیت کا مقابلہ کرنے کے لئے 100 جنگی طیارے اور 120 بحری جہاز ہائی الرٹ ہیں۔

یوکرائن پر روس کے حملے پر نیٹو کے چیف جینز اسٹولٹن برگ نے کہا ہے کہ یورپ کی فضائی حدود کے تحفظ کے لئے 100 جنگی طیارے ہائی الرٹ ہیں۔

نیٹو چیف نے مزید کہا کہ اپنے اتحادیوں کو بچانے کے لئے بحیرہ روم میں نیٹو افواج کے 120 جنگی جہاز بھی موجود ہیں۔

واضح رہے کہ نیٹو اور امریکا واضح کرچکے ہیں کہ وہ افواج کو یوکرین نہیں بھیجیں گے، ترکی نے بھی روس کے فوجی آپریشن کو مسترد کردیا ہے۔

خیال رہے کہ یوکرائن چونکہ یورپی یونین اور نیٹو کا رکن ملک نہیں لہٰذا یورپی و امریکی افواج یہاں براہ راست مداخلت نہیں کرسکتیں۔

 نیٹو کے چیف جینز اسٹولٹن برگ کی جانب سے جاری بیان میں کہا گیا ہے کہ شمالی امریکا اور یورپ کے اتحادیوں نے نیٹو کے مشرقی رکن ممالک میں پہلے ہی ہزاروں فوجی تعینات کردیے ہیں اور فوجی دستوں کو تیار رہنے کی ہدایات جاری کردی ہیں۔

روس افواج کی یوکرائن میں کاروائیوں پر مغربی دفاعی اتحاد نیٹو کا سربراہی اجلاس کل ہوگا، فوجی اتحاد نیٹو نے روس سے کارروائی فوری ختم کرنے کا مطالبہ کیا ہے اور کہا ہے کہ روس طاقت کی مدد سے تاریخ تبدیل کرنا چاہتا ہے، یوکرین سے اس کی آزادی اور خود مختاری چھین رہا ہے۔