اے این ایف انٹیلیجنس نے کراچی میں بڑی کارروائی کی ہے۔

تفصیلات کے مطابق کارروائی کے دوران منشیات کا دھندا کرنے والے نیٹ ورک کے تین کارندے گرفتار کر لئے ہیں۔

کارروائی کے دوران ملزمان سے  94.800 کلوگرام چرس برآمد ہوئی جبکہ مجموعی طور پر 1200 گرام چرس کے 79 پیکٹ برآمد ہوئے اور جوہر چورنگی کے قریب دورانِ تلاشی رکشہ سے 2 پیکٹ چرس برآمد ہوئی۔

اس کے علاوہ گرفتار رکشہ ڈرائیور محمد آصف کی نشاندہی پر اے این ایف نے گلستان جوہر میں ورکشاپ پر چھاپہ مارا۔

ورکشاپ میں کھڑی سلمان زمان اور سعید خان نامی دو ملزمان کی ٹیوٹا وٹز کار سے 47 پیکٹ چرس برآمد ہوئی۔

گرفتار ملزمان کی نشاندہی پر اے این ایف نے سفورہ گوٹھ میں بھی ملزم سعید خان کے گھر چھاپہ مارا، ملزم کے گھر میں منشیات کیلئے بنائے گئے خفیہ خانوں سے 30 پیکٹ چرس برآمد ہوئی۔

اے این ایف کے حکام نے بتایا کہ گرفتار ملزمان بلوچستان اور پشاور سے منشیات کراچی اسمگل کر کے مقامی منشیات فروشوں کو فروخت کرتے ہیں۔

واضح رہے کہ نیٹ ورک کے مزید کارندوں کی گرفتاری کے لیے ملزمان سے تفتیش جاری ہے۔