پاکستان تحریک انصاف (پی ٹی آئی) نے 26 فروری سے گھوٹکی تا کراچی  زرداری مافیا کے خلاف حقوق سندھ مارچ کا اعلان کیا ہے۔

تفصیلات کے مطابق پی ٹی آئی سندھ کے صدر علی حیدر زیدی کی قیادت میں دیگر رہنما گھوٹکی کے لیے آج روانہ ہونگے جبکہ پی ٹی آئی رہنما مارچ کے لیے ٹول پلازہ پہنچ گئے۔

واضح رہے کہ صدر پی ٹی آئی سندھ علی زیدی ٹول پلازہ پر  میڈیا سے گفتگو کرینگے۔

26 فروری سے سندھ حقوق مارچ شروع ہوگا

وزیر خارجہ مخدوم شاہ محمود قریشی نے “سندھ حقوق مارچ” کے حوالے سے سندھ کی عوام کے نام اپنے ایک اہم ویڈیو پیغام میں کہا تھا کہ 26 مارچ سندھ کی تاریخ میں ایک اہم دن ہوگا۔

شاہ محمود قریشی نے کہا کہ میں اور ہماری پاکستان تحریک انصاف سندھ کی قیادت سندھ آ رہے ہیں اور ہم سندھ کی عوام کے ساتھ “عوامی رابطہ مہم کا آغاز کر رہے ہیں۔

وزیر خارجہ کا کہنا تھا کہ ہم سندھ کے عوام کو حقائق بتانا چاہتے ہیں کہ پچھلے پندرہ سالوں میں ان کے ساتھ کیا ہوا، ہم سندھ کی عوام سے رجوع کریں گے۔

شاہ محمود قریشی نے کہا کہ یہ دورہ پورے ستائیس اضلاع پر محیط ہوگا، 26 فروری سے سندھ حقوق مارچ شروع ہو گا اور 6 مارچ کو اختتام پذیر ہوگا۔

وزیر خارجہ مخدوم شاہ محمود قریشی نے مزید کہا کہ جو لوگ سندھ کی ناقص طرز حکمرانی، لوٹ مار، کرپشن کے نظام سے تنگ آ چکے ہیں انہیں درخواست کروں گا کہ آج موقع ہے باہر نکلنے کا قدم بڑھانے کا لہذا آئیے مل کر سندھ میں تبدیلی کا آغاز کریں۔