ڈی آئی خان کی تحصیل کلاچی میں سیکیورٹی فورسز نے انٹیلی جنس بنیاد پر آپریشن کیا جس کے نتیجے میں 2 دہشتگرد مارے گئے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق سیکیورٹی فورسز نے انٹیلی جنس کی بنیاد پر ڈی آئی خان کی تحصیل کلاچی میں دہشت گردوں کے خفیہ ٹھکانے پر آپریشن کیا۔

آئی ایس پی آر کے مطابق آپریشن کے دوران سیکیورٹی فورسز کے ساتھ  فائرنگ کے شدید تبادلے میں 2 دہشت گرد مارے گئے۔

آئی ایس پی آر کا کہنا ہے کہ ہلاک دہشت گردوں کی شناخت فضل رحمان عرف خیرے اور مہران کے نام سے ہوئی، ہلاک دہشت گرد سیکیورٹی فورسز پر حملوں میں ملوث تھے۔

آئی ایس پی آر کا یہ بھی کہنا ہے کہ آپریشن کے دوران دہشت گردوں کے ٹھکانے سے بڑی تعداد میں اسلحہ و ایمونیشن بھی برآمد کیا گیا ہے

آئی ایس پی آر کا مزید کہنا ہے کہ مقامی لوگوں نے سیکیورٹی فورسز کے آپریشن کو سراہا جبکہ مقامی لوگوں نے دہشت گردی کے عفریت کے خاتمے کے لیے مکمل حمایت کا بھی اظہار کیا۔