اسپیس ایکس اور ٹیسلا کے بانی ایلون مسک نے کینیڈین وزیر اعظم کا ہٹلر سے موازنہ کرنے کے بعد ٹوئٹ ڈیلیٹ کردی۔

دنیا کے درافتادہ خطوں میں انٹرنیٹ پہنچانے کے لیے خلا میں اسٹار لنک سیٹلائٹس کا جھرمٹ بنانا ہو یا انسانی دماغ پر قابو پانے کے لیے برین چپ کی تیاری؟ ہر منفرد آئیڈیے اور تنازعے کے پیچھے ایلون مسک کا ذکر کہیں نہ کہیں آجاتاہے۔

ایلون مسک کی ٹوئٹس کبھی کرپٹو کرنسی کی قیمتیں آسمان سے زمین پر گرا دیتی ہیں تو کبھی ان کی ٹوئٹ خود انہی کی کمپنی کو ایک دن میں ہی 109 ارب ڈالر کا نقصان پہنچا دیتی ہے۔

ٹوئٹر پر ایلون مسک کے 74 ملین سے زائد فالوورز ہیں، لیکن وہ ایلون مسک ہی کیا جو اپنی ٹوئٹس پر ہنگامہ برپا نہ کریں!!

یہ بھی پڑھیں : ٹیسلا کے خلاف سیاہ فام ملازمین کے ساتھ نسلی تعصب برتنے پر مقدمہ درج

کینیڈا میں کورونا کی نئی پابندیوں کے حوالے سے کینیڈا میں ٹرک ڈرائیوروں کے مظاہرے چل رہے ہیں جن کا دائرہ کار ملک بھر میں پھیل چکا ہے جب کہ دارالحکومت اوٹاوا میں ایمرجنسی بھی نا فذ کر دی گئی ہے۔

اس حساس معاملے کو ایلون مسک کی ٹوئٹ نے اور ہوا دے دی ہے۔ گزشتہ روز ایلون مسک نے اپنی ٹوئٹ میں ٹرک ڈرائیوروں کی حمایت کرتے ہوئے  کینیڈین وزیر اعظم جسٹن ٹروڈو کا موازنہ ایڈولف ہٹلرسے کردیا۔

ایلون کی اس ٹوئٹ نے دیکھتے ہی دیکھتے ٹوئٹر پر طوفان کھڑا کردیا۔

ایلون مسک نے ایک ٹوئٹ کا جواب دیتے ہوئے ہٹلر کی ایک میم کاجسٹن ٹردو سے موازنہ کرتے ہوئے لکھا تھا کہ ’ میرے پاس بجٹ ہے۔‘

اس ٹوئٹ میں اس بات کو واضح کیا گیا تھا کہ کیسے جسٹن ٹروڈو کی حکومت نے بینکوں کو مظاہرین کے فنڈز میں کٹوتی کرنے کا حکم جاری کیا ہے۔

 تاہم ایلون مسک نے کچھ گھنٹوں بعد ہی اس ٹوئٹ کو ڈیلیٹ کردیا تھا۔

ایلون مسک کی جانب سے یہ ٹوئٹ ایک ایسے وقت میں کی گئی جب امریکی سیکیوریٹیز اینڈ ایکسچینج کمیشن نے ایلون مسک پر امریکی حکومت پر تنقید کرنے کا الزام عائد کیا گیا ہے۔