صوبہ خیبرپختونخوا میں ایک ماہ کے دوران 9 لاکھ افراد نے صحت کارڈ کے ذریعے علاج کروایا ہے۔

صحت کارڈ ماہانہ داخلہ رپورٹ کے مطابق صوبے میں اب تک صحت کارڈ کے تحت علاج کرنے والوں کی تعداد نو لاکھ کے قریب ہوچکی ہے۔

 جاری کردہ رپورٹ میں بتایا گیا کہ سرکاری ہسپتالوں میں ڈیڑھ لاکھ جبکہ نجی ہسپتالوں میں چھ لاکھ سے زائد افراد نے علاج صحت کارڈ کے تحت کروایا۔

 1 لاکھ 36 ہزار سے زائد افراد نے صوبے کے مختلف ایم ٹی آئیز میں اپنا علاج صحت کارڈ کے زریعے کروایا، جبکہ ایم ٹی آئی ہسپتالوں میں صحت کے کارڈ کے زریعے علاج میں دو گُنا اضافہ ہوا۔

واضح رہے کہ جولائی 2021 کے بعد صحت کارڈ کے زریعے علاج میں دو گُنا اضافہ ہوا البتہ اب تک نجی و سرکاری ہسپتالوں میں صحت کارڈ کے تحت علاج پر 22 بلین خرچے جاچکے ہیں۔

صحت کارڈ پر کن بیماریوں کا علاج کیا جاتا ہے؟

صحت سہولت پروگرام کے تحت ایک خاندان کے تمام افراد کے لیے 10 لاکھ روپے سالانہ مقرر کیے گئے ہیں، تاہم اس کا طریقہ کار یہ ہے کہ گھر کے کسی ایک فرد پر یہ تمام رقم خرچ نہیں کی جاتی بلکہ اس میں خاندان کے ہر فرد کے لیے ایک حد مقرر کر دی گئی ہے۔

اس پروگرام کی دستیاب معلومات کے مطابق ترجیحی علاج میں بیماریوں کی فہرست یہ ہے۔ امراض قلب اور شریان، اتفاقیہ اور حادثاتی علاج، ثانوی سطح کی بیماریوں کی پیچیدگی کی صورت میں ریفرل، ذیابیطس کی پیچیدگیاں، گردے کی پیوندکاری، مصنوعی بازو یا ٹانگ، ہر قسم کا کینسر، گردے اور مثانے کی بیماریاں بشمول ڈائلیسس، چھاتی کے سرطان کی اسکریننگ اور نیورو سرجری۔