محمود خان نے کہا ہے کہ ملکی سرحدوں کے دفاع کے لئے سکیورٹی فورسز نے لازوال قربانیاں دی ہیں۔

اپنے ایک بیان میں وزیراعلیٰ خیبر پختونخوا محمود خان نے پاک افغان بارڈر پر ضلع کرم میں سیکیورٹی اہلکاروں پر دہشت گردوں کے حملے کی مذمت کی ہے۔

وزیراعلیٰ خیبر پختونخوا نے واقعے میں سکیورٹی فورسز کے پانچ اہلکاروں کی شہادت پر تعزیت کا اظہار کیا جبکہ وزیراعلیٰ خیبر پختونخوا نے شہداء کے اہل خانہ سے دلی ہمدردی کا اظہار بھی کیا ہے۔

محمود خان نے کہا کہ اللہ تعالٰی شہداء کے درجات بلند کرے اور لواحقین کو صبر جمیل عطا کرے۔

 وزیراعلیٰ خیبر پختونخوا محمود خان کا مزید کہنا تھا کہ سرحد پار سے اس طرح کے واقعات افسوسناک ہیں، ملکی سرحدوں کے دفاع کے لئے سکیورٹی فورسز نے لازوال قربانیاں دی ہیں۔

واضح رہے کہ افغان بارڈر پر دہشت گردوں کی سرحد پار سے فائرنگ کے نتیجے میں 5 سیکیورٹی اہلکار شہید ہوگئے۔

پاک فوج کے شعبہ تعلقات عامہ(آئی ایس پی آر) کی جانب سے جاری کردہ بیان میں کہا گیا ہے کہ پاک افغان بارڈر پر دہشت گردوں نے سرحد پار سے فائرنگ کی ، دہشت گردوں نے ضلع کرم میں پاک افغان بارڈر پر فوجی جوانوں کو نشانہ بنایا۔

آئی ایس پی آر کے مطابق فائرنگ کے تبادلے میں دہشت گردوں کو بھاری جانی نقصان ہوا جبکہ دہشت گردوں کی فائرنگ سے5سیکیورٹی اہلکار شہید ہوگئے۔

آئی ایس پی آر کا کہنا ہے کہ شہید ہونے والوں میں لانس نائیک عجب نور، سپاہی ضیااللہ ، ناہید اقبال، سمیر اللہ اور ساجد علی شہید شامل ہیں۔

 آئی ایس پی ار کا یہ بھی کہنا ہے کہ افغان عبوری حکومت ایسی سرگرمیوں کو روکنےکیلئے اقدامات کرے۔

آئی ایس پی آر کا مزید کہنا ہے کہ پاک فوج ملکی سرحدوں کے دفاع کیلئے پر عزم ہے، ہمارے بہادر جوانوں کی قربانیاں ہمارےعزم کو مضبوط کرتی ہے۔