شیخ رشید کا کہنا ہے کہ نواز شریف کی سیاست نسلہ ٹاور کی طرح اور پی پی پی کی حکومت تجوری ہایٹس کی طرح گرے گی۔ 

وفاقی وزیر داخلہ شیخ رشید احمد نے راولپنڈی میں لال حویلی کے باہر یوم یکجہتی کشمیر جلسے سے خطاب کرتے ہوئے کہا کہ آج کشمیر کا یکجہتی کا دن پورے پاکستان میں جوش ولولے سے منایا جا رہا ہے۔

شیخ رشید نے کہا کہ آج لال حویلی کا رشتہ لال چوک سری نگر سے ہے۔ لال حویلی کے باہر لوگوں کی بڑی تعداد کشمیر سے یکجہتی منا رہے ہیں۔

وفاقی وزیرداخلہ نے کہا کہ عمران خان اس ملک سے مہنگائی کے خاتمے کیلئے کام کر رہا ہے۔ میری پندرہویں وزارت ہے۔  یہاں کوئی بدمعاش گردن اٹھا کر نہیں چل سکتا۔ کینٹ اور سٹی کے مستحق افراد میں دس ہزار کارڈ جاری کریں گے.

انھوں نے کہا کہ ہم بھاگنے والے لوگ نہیں ہیں، کلاشنکوف کیس میں 7 سال قید کاٹی ہے۔ مجھ سے زائد جیل کاٹنے والے شام کو ٹی وی پر آجائیں.

سیاسی گولہ باری کرتے ہوئے شیخ رشید نے کہا کہ سارے گندے انڈے اکھٹے ہو کر اسلام آباد آ جائیں۔ ایک ٹھوکر میں سب کو گرا دیں گے۔ آپ کی سیاست ختم ہوجائے گی۔

وفاقی وزیرداخلہ نے کہا کہ مجھے پھانسی دے دی جائے میں تیار ہوں گا لیکن ملک سے فرار نہیں ہوں گا اور نہ ہی جعلی میڈیکل سرٹیفکیٹ دے کر ملک سے  بھاگوں گا۔

انھوں نے مذید کہا کہ پاکستان کی عظیم افواج ہر جگہ دہشت گردوں کو شکست دے رہی ہیں۔