وفاقی وزیر منصوبہ بندی اسد عمر نے کہا ہے کہ پاکستان کھیلوں اور دیگر بین الاقوامی ایونٹس کے لئے محفوظ اور پرامن ملک ہے۔

وفاقی وزیر منصوبہ بندی اسد عمر کی زیر صدارت پاکستان میں منعقد ہونے والے 14ویں ساؤتھ ایشین گیمز2023 سے متعلق پہلے اسٹیئرنگ کمیٹی کا اجلاس ہوا۔

اجلاس میں بین الصوبائی رابطہ وزیر ڈاکٹر فہمیدہ مرزا، پنجاب کے وزیر کھیل محمد تیمور خان، سیکرٹری حکومت پنجاب، سیکرٹری آئی پی سی، صدر پاکستان اولمپک ایسوسی ایشن (پی او اے) ریٹائرڈ لیفٹیننٹ جنرل عارف حسن اور ڈائریکٹر جنرل پاکستان اسپورٹس بورڈ اور دیگر متعلقہ اسٹیک ہولڈرز نے شرکت کی۔

صدر پاکستان اولمپک ایسوسی ایشن نے کہ کہ وزیراعظم نے 14ویں ساؤتھ ایشین گیمز کی منظوری دے دی ہے، پاکستان اولپمک ایسوسی ایشن میگا ایونٹ کے انعقاد کی تیاری کے لیے ایک ورکنگ کمیٹی تشکیل دی ہے.

اجلاس میں بریفنگ دی گئی کہ پاکستان نے آخری بار 2004 میں اسلام آباد میں علاقائی کھیلوں کے گالا کی میزبانی کی تھی، والی بال، ریسلنگ، ویٹ لفٹنگ، تائیکوانڈو، ایتھلیٹکس اور ہاکی کے تربیتی کیمپوں کا اہتمام کیا جا رہا ہے، والی بال اور تائیکوانڈو کے لیے غیر ملکی کوچز کو بھی ہائیر کیا جائے گا، ایونٹس لاہور، فیصل آباد، سیالکوٹ اور اسلام آباد میں منعقد کیے جائیں گے۔

اسد عمر نے کہا کہ ہمارا مقصد دنیا کو سافٹ امیج دکھانا ہے، پاکستان کھیلوں اور دیگر بین الاقوامی ایونٹس کے لیے ایک محفوظ اور پرامن ملک ہے، پاکستان میں ایسے میگا ایونٹس منعقد کرنے کی صلاحیت موجود ہے۔

اسدعمر نے ہدایت کی کہ سکریٹری آئی پی سی میگا ایونٹ کے لیے وزارت خزانہ کے ذریعے مختص بجٹ مختص کرنے کے لیے سمری بھیجیں۔