پارلیمانی سیکرٹری عالیہ حمزہ کا کہنا ہے کہ تجارتی خسارے میں پچھلے دو ماہ سے مسلسل کمی آرہی ہے۔

تفصیلات کے مطابق  پارلیمانی سیکرٹری عالیہ حمزہ نے معاشی صورتحال سے متعلق بیان دیتے ہوئے کہا کہ ‏جنوری 2022 میں پاکستان نے 2.55 ارب ڈالر کی برآمدات کیں، جو گزشتہ سال جنوری کے مقابلے میں 19  فیصداضافہ ہے۔

 عالیہ حمزہ کا کہنا تھا کہ ایکسپورٹ آف گڈز کا حجم 24 فیصد اضافے کے ساتھ  17.67 ارب ڈالر تک پہنچ چکا ہے، تجارتی خسارے میں پچھلے دو ماہ سے مسلسل کمی آرہی ہے۔

 عالیہ حمزہ نے کہا کہ جنوری میں پاکستان نے 1.55 ارب ڈالر کے ساتھ ملکی تاریخ کی سب سے بڑی ٹیکسٹائل برآمدات کیں۔

پارلیمانی سیکرٹری نے کہا کہ امریکہ اور یورپی یونین کو ٹیکسٹائل مصنوعات برآمدات میں پاکستان نے پہلے ہی ہندوستان اور بنگلہ دیش کو پیچھے چھوڑ دیا ہے۔

عالیہ حمزہ نے کہا کہ آج عالمی جریدے پاکستانی معیشت کی بہتری اور استحکام پر لکھ رہے ہیں، بلوم برگ اور اکانومسٹ پاکستان کے بہتر مستقبل کی نوید سنا رہے ہیں۔

انہوں نے مزید کہا کہ  ورلڈ اکنامک فورم نے وزیراعظم عمران خان حکومت کی غربت کے خاتمہ ، ہیلتھ کوریج، ماحولیاتی تحفظ، کرپشن کے خاتمہ اور انسانی سرمایہ میں بہترین پیش رفت کا اعتراف کیا ہے۔