رہنما پیپلز پارٹی سینیٹر پلوشہ خان نے کہا ہے کہ شاہ محمود قریشی اپوزیشن کی ماسی بننے کی کوشش نہ کریں۔

پلوشہ خان نے اپنے جاری کردہ ایک بیان میں کہا کہ شاہ محمود قریشی سیاسی اخلاقیات کی جن بنیادوں پر کھڑے ہیں سب کو معلوم ہے، شاہ محمود اپوزیشن کی ماسی بننے کی کوشش نہ کریں۔

انہوں نے کہا کہ شاہ محمود قریشی نے آج سینیٹ کے ایوان کی توہین کر کے اپنی اصلیت بے نقاب کی، شاہ محمود قریشی کو اپنی کارکردگی بتانے کیلٸے کچھ نہیں تھا، سید یوسف رضا گیلانی کے خلاف سیاسی خانہ بدوش بیان بازی کر رہے ہیں۔

ان کا کہنا تھا کہ سلیکٹڈ حکومت نے اسٹیٹ بینک ترمیمی بل کے ذریعے سینیٹ پر شب خون مارا، چیئرمین سینیٹ کا کردار کٹھ پتلی سے زیادہ نہیں۔

رہنما پیپلز پارٹی سینیٹر پلوشہ خان نے مزید کہا کہ سلیکٹڈ وزیر اعظم اور ان کے وزراء کی ڈکشنری میں شرم نامی کوئی لفظ نہیں، عمران خان بہت بڑی وباء جبکہ فواد چوہدری چھوٹی موٹی بیماری ہیں۔