علامہ طاہر اشرفی نے کہا ہے کہ خود ہی جج اور منصف بننے کے رجحان کو مل کر ختم کرنا ہوگا۔

وزیراعظم عمران خان کے معاون خصوصی برائے مذہبی ہم آہنگی حافظ طاہر محمود اشرفی نے سانحہ تلمبہ کے حوالے سے ڈپٹی کمشنر سلمان خان،ڈی پی او سید ندیم عباس کے ہمراہ پریس کانفرنس کرتے ہوئے کہا کہ سانحہ تلمبہ کی جتنی مذمت کی جائے کم ہے۔

انہوں نے کہا کہ وزیر اعظم عمران خان نے  واقعہ کے ذمہ داران کو سخت سزا دلوانی کی ہدایت کی ہے، وزیر اعظم اور وزیر اعلیٰ پنجاب خود صورتحال کو خود مانیٹر کررہے ہیں۔

وزیراعظم کے نمائندہ خصوصی برائے مذہبی ہم آہنگی کا کہنا تھا کہ سب اتحاد کا مظاہرہ کرکے دشمن کے عزائم خاک میں ملائیں، خود ہی جج اور منصف بننے کے رجحان کو مل کر ختم کرنا ہوگا۔

علامہ طاہر اشرفی کا یہ بھی کہنا تھا کہ پولیس نے 300 سے زائد افراد پر مقدمہ درج کرلیا اور اب تک  62 ملزمان کو گرفتار بھی کرلیا گیا ہے۔ واقعہ کے ذمہ داران کو کیفر کردار تک پہنچایا جائے گا

وزیراعظم عمران خان کے معاون خصوصی برائے مذہبی ہم آہنگی حافظ طاہر محمود اشرفی کا مزید کہنا تھا کہ مقتول مشتاق فاتر العقل شخص تھا، بے گناہوں کا قتل عام کرنے والے ہم میں سے نہیں کیونکہ جس نے ایک انسان کا قتل کیا اس نے پوری انسانیت کا قتل کیا۔