افغانستان کے لیگ اسپنر راشد خان نے مقامی میڈیا سے گفتگو کرتے ہوئے کہا کہ پاکستان سپر لیگ کا شمار دنیا کی ٹاپ تھری لیگز میں ہوتا ہے۔

پی ایس ایل 7 میں لاہور قلندرز کی نمائندگی کرنے والے مایہ ناز لیگ اسپنر نے کہا کہ پی ایس ایل 7 میں 140 کلومیٹر کی رفتار سے گیند کرانے والے فاسٹ بالرز موجود ہیں۔

راشد خان کا کہنا تھا کہ پی ایس ایل میں جہاں ہر ٹیم کے پاس پیس بیٹریز موجود ہیں وہیں تمام ٹیموں کے پاس بہترین بیٹرز بھی ہیں۔

افغان لیگ اسپنر نے کہا کہ ایک طرف تیز رفتار فاسٹ بالرز اور دوسری جانب جارحانہ کھیلنے والے بیٹرز یہ کمبی نیشن ہر ٹیم کو متوازن بناتا ہے۔

راشد خان نے کہا کہ کرکٹ اور خاص طور پر ٹی ٹوئنٹی میں ہر بالر پر دباؤ ہوتا ہے مگر کھلاڑی اپنے اسکلز کو استعمال کر کے اس دباؤ سے باہر نکل سکتا ہے۔

لاہور قلندر کی بالنگ کا اہم حصہ راشد خان نے کہا کہ لاہور قلندرز کی ٹیم کرکٹ کے ہر شعبے میں 100 فی صد نتائج دینے کے فارمولے پر عمل پیرا ہے۔

راشد خان نے مزید کہا کہ میں پی ایس ایل میں اپنی کرکٹ سے لطف اندوز ہو رہا ہوں ۔