نوابشاہ میں پیپلز میڈیکل یونیورسٹی کی ڈاکٹر پروین رند کی جانب سے یونیورسٹی میں لڑکیوں کو زیادتی کے بعد قتل کرنے کے انکشافات پر حکومت نے تحقیقات کے لئے تین رکنی کمیٹی تشکیل دے دی۔

پیپلز میڈیکل یونیورسٹی کی ڈاکٹر پروین رند نے الزام لگاتے ہوئے کہا ہے کہ یونیورسٹی میں لڑکیوں کو زیادتی کے بعد قتل کردیا جاتا ہے۔

ڈاکٹر پروین رند نے کہا کہ زیادتی کے بعد قتل کی جانے والی لڑکیوں کی لاش کو پنکھے میں لٹکا کر خودکشی کا رنگ دیا جاتا ہے۔

انہوں نے کہا کہ کل مجھ پر بھی تشدد کیا گیا، ہم احتجاج پر بیٹھے ہیں جب تک ملزمان کے خلاف مقدمہ درج اور ہمیں انصاف نہیں ملتا تب تک ہمارا احتجاج ختم نہیں ہوگا۔

دوسری جانب سندھ حکومت نے واقعے کی تحقیقات کا حکم دے دیا، 3 رکنی تحقیقاتی ٹیم پیپلز میڈیکل یونیورسٹی نوابشاہ کی ڈاکٹر پروین سے پیش آنے والے واقعے اور الزامات کی تحقیقات کرنے نوابشاہ پہنچے گی۔

وی سی پیپلز میڈیکل یونیورسٹی نوابشاہ کو متاثرہ ڈاکٹر پروین سمیت الزامات کی زد میں آنے والے تمام عملے سمیت پیش ہونے کا حکم دیا گیا ہے۔