عہدے کی مدت مکمل ہونے پر سبکدوش ہونے والے چیف جسٹس آف پاکستان جسٹس گلزار احمد نے آج آخری کیس سنا۔

چیف جسٹس گلزاراحمد کی سربراہی میں تین رکنی بنچ نے آج آخری کیس کی سماعت کی۔ جسٹس محمد علی مظہر اور جسٹس عائشہ اے ملک بنچ کا حصہ تھے۔

چیف جسٹس آف پاکستان جسٹس گلزار احمد نے آخری کیس موٹر وے پولیس کے اہلکار مقصود احمد کی ملازمت سے متعلق سنا۔

سپریم کورٹ کے تین رکنی بنچ نے مقصود احمد کی ملازمت برطرفی کے خلاف درخواست ابتدائی سماعت کیلئے منظور کی۔

مقصود احمد کو ذہنی بیماری کی وجہ سےغیر حاضر رہنے پر 2015 میں موٹروے پولیس سے نکال دیا گیا تھا۔

مقصود احمد نے سروس ٹربیونل کا فیصلہ سپریم کورٹ میں چیلنج کر رکھا ہے۔

چیف جسٹس آف پاکستان آج ریٹائر ہو رہے ہیں 

چیف جسٹس آف پاکستان گلزار احمد کے اعزاز میں آج سپریم کورٹ میں فل کورٹ ریفرنس منعقد ہوگا جبکہ رات کو سپریم کورٹ کی جانب سے الوداعی عشائیہ دیا جائے گا۔

چیف جسٹس آف پاکستان جسٹس گلزاراحمد کےاعزاز میں فل کورٹ ریفرنس کی تقریب سپریم کورٹ میں ہوگی جس میں سپریم کورٹ کے تمام ججز شریک ہوں گے۔

نامزد چیف جسٹس آف پاکستان عمرعطا بندیال فل کورٹ ریفرنس سے خطاب کریں گے جبکہ وائس چیئرمین پاکستان بار کونسل، صدر سپریم کورٹ بار، اٹارنی جنرل آف پاکستان بھی خطاب کریں گے۔

جسٹس گلزار احمد دو سال دو ماہ سے زائد عرصے تک چیف جسٹس آف پاکستان رہے۔

نامزد چیف جسٹس کی حلف برداری

نامزد چیف جسٹس عمرعطا بندیال کل بہ روز بدھ اپنےعہدے کا حلف اٹھائیں گے۔

نامزد چیف جسٹس عمر عطا بندیال کی حلف برداری کی تقریب ایوان صدر میں منعقد ہوگی۔ صدر مملکت عارف علوی ان سے حلف لیں گے۔

وزارت قانون وانصاف کے زیر اہتمام ایوان صدر میں چیف جسٹس کی حلف برداری کی تقریب کی تمام تیاریاں مکمل کر لی گئی ہیں۔