الیکشن کمیشن نے دہری شہریت کیس میں پی ٹی آئی رہنما فیصل واوڈا کو نااہل قرار دیدیا ہے۔

پاکستان پیپلز پارٹی کے چئیرمین بلاول بھٹو زرداری نے سوشل میڈیا پر جاری اپنی ٹوئٹ میں فیصل واوڈا کی نااہلی کے فیصلے پر ردعمل دیتے ہوئے کہاکہ پی ٹی آئی کی ایک اور وکٹ گر گئی۔

 چئیرمین پی پی نے مزید کہاکہ پی پی پی ٹیم کو مبارک ہو۔

فیصل واوڈا کا وزیراعظم سے رابطہ

پی ٹی آئی رہنما فیصل واوڈا نے نااہلی کا فیصلہ آنے کے بعد وزیراعظم عمران خان سے رابطہ کیا ہے۔

 فیصل واوڈا نے الیکشن کمیشن کے فیصلے سے وزیر اعظم کو آگاہ کیا۔

الیکشن کمیشن کے فیصلے کو چیلنج کرنے کے حوالے سے فیصل واوڈا نے وزیر اعظم سے مشاورت بھی کی۔

ذرائع کے مطابق فیصل واوڈا جلد وکلا سے مشاورت کے بعد فیصلے کو چیلنج کرینگے۔

پی ٹی آئی رہنما فیصل واوڈا نے الیکشن کمیشن سے فیصلے کی کاپی حاصل کرنے کیلئے بھی رجوع کرلیا ہے۔

 ‘فیصل واوڈا صادق اور امین نہیں رہے’

الیکشن کمیشن کے تین رکنی بنچ نے دوہری شہریت کیس میں تحریک انصاف کے رہنما فیصل واوڈا کو نااہل قرار دے دیا۔

الیکشن کمیشن آف پاکستان کے فیصلے کے مطابق فیصل واوڈا کو آرٹیکل 62 ون ایف کے تحت نا اہل قرار دیا گیا۔

الیکشن کمیشن نے فیصلے میں فیصل واوڈا کو بہ طور رکن اسمبلی تمام مراعات دو ماہ میں واپس کرنے کا حکم دیا۔

الیکشن کمیشن کے فیصلے کے مطابق الیکشن کمیشن نے متفقہ طور پر فیصل واوڈا کو نا اہل قرار دیا ہے۔ فیصل واوڈا نے 2018 کے انتخابات میں غلط بیان حلفی جمع کرایا۔

فیصلے میں کہا گیا کہ کاغذات نامزدگی جمع کرانے کے وقت فیصل واوڈا امریکی شہریت رکھتے تھے۔ جھوٹا بیان حلفی جمع کرانے پر فیصل واوڈا صادق اور امین نہیں رہے۔