مریم اورنگزیب نے کہا ہے کہ تحریک عدم اعتماد ہر سیاسی جماعت کا آئینی و قانونی حق ہے۔

پاکستان مسلم لیگ (ن) کی ترجمان مریم اورنگزیب نے اپنے ایک بیان میں کہا کہ جیسے جیسے دن قریب آ رہے ہیں، خوف میں مبتلا عمران صاحب پشاور میں ایک شخص جن کی حالیہ ہفتوں میں تعنیاتی ہوئی ہے ہمارے اراکین پارلیمان کو دباؤ میں لانے کی کوشش کررہے ہیں۔

مریم اورنگزیب نے کہا کہ تحریک عدم اعتماد ہر سیاسی جماعت کا آئینی و قانونی حق ہے، اپوزیشن اور پی ڈی ایم میں شامل تمام جماعتیں مشاورت سے یہ تحریک لا رہی ہیں۔

پاکستان مسلم لیگ (ن) کی ترجمان کا کہنا تھا کہ خبردار کر رہی ہوں کہ اِن صاحب سے عمران صاحب پشاور سے یہ فون کالیں کرانا فوری بند کریں، آپ کی سیاست میں ادارے کو گھسیٹنے کی وجہ سے پہلے ہی ادارے کی ساکھ جس قدر متاثر ہوئی، اس کی نظیر نہیں ملتی۔

انہوں نے کہا کہ عمران صاحب آپ باز نہ آئے تو ہم اِن صاحب کا نام لینے پر مجبور ہوں گے، آپ سیاست کے میدان میں سیاسی انداز میں مقابلہ کریں۔

پاکستان مسلم لیگ (ن) کی ترجمان مریم اورنگزیب کا مزید کہنا تھا کہ عمران صاحب یہ غیر آئینی حرکتیں آپ کے خوف اور شکست کا واضع ثبوت ہیں جس کی وجہ سے ادارے کے حصے میں بدنامی آرہی ہے۔