راجہ بشارت نے کہا ہے کہ نمبرداری نظام نچلی سطح پر حکومتی عملداری یقینی بنانے کا اہم ذریعہ ہے۔

وزیر قانون پنجاب محمد راجہ بشارت سے نمبردار ایسوسی ایشن کے وفد کی ملاقات ہوئی جس میں نمبردار ایسوسی ایشن کے وفد نے وزیراعلیٰ اور وزیر قانون پنجاب سے تشکر کا اظہار کیا۔

ملاقات کے دوران وزیر قانون کو وفد نے پنجاب میں نمبرداری نظام کو درپیش مسائل سے آگاہ کیا۔

اس موقع پر وزیر قانون پنجاب محمد راجہ بشارت نے پنجاب نمبردار ایسوسی ایشن کو مسائل پر ہمدردانہ غور کی یقین دہانی کروائی۔

وزیر قانون پنجاب نے کہا کہ نمبرداری نظام نچلی سطح پر حکومتی عملداری یقینی بنانے کا اہم ذریعہ ہے، وزیراعلیٰ عثمان بزدار نمبرداری نظام کو موثر اور بااختیار بنانا چاہتے ہیں۔

راجہ بشارت کا کہنا تھا کہ وزیراعلیٰ پنجاب نے نمبرداروں کا صوبائی کنونشن بلانے کی ہدایت کی ہے، متوقع کنونشن میں 85 ہزار سے زائد نمبرداروں کے مسائل پر غور ہوگا۔

وزیر قانون پنجاب محمد راجہ بشارت کا مزید کہنا تھا کہ سرکاری اراضی بے زمین نمبرداروں کو الاٹ کرنے کا جائزہ لیں گے۔
علاوہ ازیں وزیر قانون پنجاب راجہ بشارت کی زیرصدارت قذافی اسٹیڈیم میں اعلیٰ سطحی اجلاس ہوا جس میں پی ایس ایل کی سیکیورٹی کا جائزہ لیا گیا ، کمشنر اور سی سی پی او لاہور نے سیکیورٹی پلان پر بریفنگ دی۔

اجلاس میں چیف سیکرٹری، آئی جی اور اے سی ایس ہوم نے شرکت کی۔

راجہ بشارت نے کہا  کہ طے شدہ پلان پر اسکی روح کے مطابق عملدرآمد یقینی بنایا جائے، مقامی اور غیرملکی کھلاڑیوں کی نقل و حرکت بلٹ پروف گاڑیوں میں ہوگی۔

انہوں نے کہا کہ روٹ پر خراب کیمرے فوری تبدیل کرکے نئے لگانے کی ہدایت دی۔

وزیر قانون پنجاب نے کہا کہ اہل لاہور ماضی کی طرح مہمانوں کو خندہ پیشانی سے خوش آمدید کہیں ، شہری کھیلوں کی بحالی کیلئے حکومتی انتظامات میں تعاون کریں۔

چیف سیکرٹری کامران افضل نے کہا کہ پارکنگ ایریاز کے بارے میں میڈیا پر تشہیری مہم چلائی جائے۔

آئی جی راؤ سردارعلی نے کہا کہ اتوار کو تمام ادارے مشترکہ فرضی مشق کریں گے۔