پنجاب حکومت کے ترجمان حسان خاور نے کہا ہے کہ بزدار حکومت ہر شعبہ میں ریکارڈ کامیابیاں سمیٹ رہی ہے۔

وزیراعلیٰ پنجاب کے معاون خصوصی برائے اطلاعات حسان خاور نے اپنے بیان میں کہا ہے کہ بزدار حکومت کے گزشتہ تین سال انقلابی تعمیر و ترقی اور تبدیلی کے سال رہے ہیں۔

انہوں نے کہا کہ بزدار حکومت نے محکمہ آباشی میں انتظامی بہتری اور مفاد عامہ کیلئے نئی پالیسیاں اور قوانین کا آغاز کیا ہے، بیراجوں، نہروں کے نظام کی بحالی پر خصوصی توجہ دی گئی ہے۔

حسان خاور نے کہا کہ رود کوہیوں میں پانی کو ذخیرہ اور قابل استعمال بنانے کے کئی منصوبوں پر کام جاری ہے، کینالز کی تعمیرو بحالی کے میگا پراجیکٹس سے عوام کو بڑی سہولیات مہیا کر رہے ہیں۔

پنجاب حکومت کے ترجمان نے کہا کہ پی ٹی آئی حکومت نے 32 ارب کی خطیر رقم سے جلال پور کینال منصوبہ شروع کیا، ضلع جہلم اور خوشاب کا پونے 2 لاکھ ایکڑ رقبہ سیراب ہوگا۔

انکا کہنا ہے کہ گریٹر تھل کینال ضلع بھکر، لیہ، خوشاب، مظفر گڑھ اور جھنگ کے قریباً تین لاکھ ایکڑ رقبے کو سیراب کرے گی، ایس ایم بی لنک کینال کی ترسیل کی صلاحیت 13ہزار کیوسک سے زائد کی جارہی ہے۔

حسان خاور نے کہا کہ پی ٹی آئی حکومت وزیراعظم عمران خان اور وزیراعلیٰ عثمان بزدار کی قیادت میں مہنگائی پر قابو پا رہی ہے، احساس راشن اسکیم عام آدمی پر مہنگائی کے اثرات کم کرے گی۔

انہوں نے مزید کہا کہ صحت کارڈ کے ذریعے پی ٹی آئی حکومت پہلے ہی عوام کے دلوں میں گھر کر چکی ہے، عوام پرائیویٹ اسپتالوں سے دھڑا دھڑ علاج کروا رہے ہیں، عوامی خدمت سے اگلے انتخابات میں بھی سرخرو ہونگے۔