معروف ہدایتکار عامر یوسف نے ثنا جاوید پر اپنے پراجیکٹ کو تباہ کرنے کا الزام عائد کیا ہے۔

رپورٹ کے مطابق پاکستان شوبز انڈسٹری کے معروف ہدایتکار عامر یوسف نے بھی اداکارہ ثناء جاوید پر سنگین الزامات لگاتے ہوئے اُنہیں  انتہائی غیر پیشہ ور فنکار قرار دے دیا۔

ہدایتکار عامر یوسف نے ثنا کے ان کے ساتھ رویے کو لے کر خاموشی توڑتے ہوئے فوٹو اینڈ ویڈیو شیئرنگ ایپ انسٹاگرام پر ایک پوسٹ شئیر کی ہے جس کے ساتھ اُنہوں نے ایک طویل کیپشن بھی لکھا۔

عامر یوسف نے ثنا جاوید پر الزامات عائد کرتے ہوئے کہا ہے کہ ’میں نے کبھی بھی کسی فنکار کے سیٹ پر غیر پیشہ ورانہ برتاؤ کے بارے میں بات نہیں کی لیکن اب مجھے محسوس ہورہا ہے کہ مجھے مزید خاموش نہیں رہنا چاہیے۔‘

اُنہوں نے کہا کہ ’اس میں کوئی شک نہیں کہ ثناء جاوید انتہائی غیر پیشہ ور فنکار ہیں، اُنہوں نے میرے ڈرامہ سیریل ’اعتراض‘ کو لفظی طور پر تباہ کر دیا اور اگر وہ انکار کرتی ہیں تو میرے پاس دستاویزی ثبوت موجود ہیں کہ جو یہ ثابت کریں گے کہ ثناء جاوید نے میرے ساتھ کتنا بُرا کیا۔‘

عامر یوسف نے مزید کہا کہ ’ثناء جاوید نے ناصرف میرا پراجیکٹ تباہ کیا بلکہ اُنہوں نے میرے سینئر ندیم بیگ کے ساتھ میرے تعلقات کو بھی تباہ کیا جنہیں میں اپنا سرپرست اور محسن سمجھتا ہوں۔‘

اپنی پوسٹ کے آخر میں عامر یوسف نے مطالبہ کیا کہ ایکٹرس الائنس ٹرسٹ (اے سی ٹی) پاکستان کی چیئرپرسن عتیقہ اوڈھو اور یونائیٹڈ پروڈیوسرز ایسوسی ایشن(یو پی اے) کے چیئرمین نبیل ظفر مذکورہ ایسوسی ایشنز کی ایک مشترکہ کمیٹی تشکیل دیں اور ثناء جاوید پر لگائے گئے سنگین الزامات کی تحقیقات کریں۔‘

یاد رہے کہ سوشل میڈیا پر اداکارہ ثنا جاوید کو سخت تنقید کا سامنا ہے کیونکہ ان پر ماڈل منال سلیم کی جانب سے نامناسب الفاظ استعمال کرنے کا الزام عائد کیا گیا تھا جس کے بعد شوبز انڈسٹری سے وابستہ کئی افراد ثنا جاوید کے خلاف بول پڑے اور ان پر الزامات عائد کئے۔