روسی افواج کے یوکرین پر حملے کو تیسرا ہفتہ شروع ہو چکا ہے، یوکرینی شہریوں کا جنگ زدہ علاقوں سے انخلاء اب بھی جاری ہے۔

یوکرین پر روس کے حملے کے دو ہفتوں بعد یوکرین کے بعض تنازعے والے علاقوں میں انخلاء شروع ہو گیا ہے۔ لیکن عام شہری مسلسل نشانہ بن رہے ہیں۔

ایسا لگ رہا ہے کہ روسی افواج تین سمتوں سے یوکرین کے دارالحکومت کیف کی جانب پیشقدمی کر رہی ہیں۔ اُنہوں نے مشرقی شہر ماریوپول میں فضائی حملے کیے ہیں اور ملک کے دیگر حصوں میں اپنے جارحانہ حملے جاری رکھے ہوئے ہیں۔

روس کی وزارت دفاع نے بدھ کے روز اعلان کیا کہ اُس نے کیف سمیت پانچ شہروں سے نکل جانے کے خواہشمند عام شہریوں کیلئے انخلائی راہداریاں کھول دی ہیں۔

یوکرینی حکومت نےعام شہریوں کو شمال مشرق میں واقع سُمی سے وسطی یوکرین میں پولٹاوا، اور ماریوپول سے جنوب مشرق میں واقع زاپورِژژِیا انخلاء کروانے کا منصوبہ بنایا تھا۔

ایک یوکرینی مذاکرات کار کا کہنا ہے کہ بدھ کو ایک ہی روز میں چالیس ہزار سے زائد افراد کا انخلاء کروایا گیا ہے۔ اس مذاکرات کار کے مطابق اُنہوں نے ایک لاکھ لوگوں کا انخلاء کروانے کی کوشش کی تھی۔

یوکرینی حکام کا کہنا ہے کہ روس انخلاء کرنے والوں کی حفاظت کی ضمانت نہیں دے رہا جبکہ اُس کے فوجی دستے بعض راستوں پر اب بھی گولہ باری کر رہے ہیں۔

 یوکرین نے اپنے شہریوں کا روس اور بیلاروس انخلاء مسترد کر دیا ہے۔ روس نے یوکرین پر الزام لگایا ہے کہ وہ اس کی پیشکش قبول کرنے میں ناکام رہا ہے۔