پنجاب کے شہر ڈجکوٹ اور گردونواح کے علاقے بارش کے بعد پھر سے دھند کی لپیٹ میں آگئے ہیں۔

تفصیلات کے مطابق شہری علاقوں میں حدنگاہ 10 میٹر اور دیہی علاقوں میں 5 میٹر رہ گئی جبکہ مین شاہراہوں پر بھی ٹریفک کا بہاؤ کم ہو چکا ہے۔

موٹروے فیصل آباد، سمندری اور گوجرہ رات گئے سے ٹریفک کے لئے بند کر دیئے گئے ہیں۔

دوسری جانب ضلع بہاولنگر کا تحصیل فورٹ عباس میں بھی دھند راج برقرار ہے جس کے باعث حد نگاہ انتہائی کم ہوگئی ہے۔

دھند کے باعث ٹریفک کی روانی سست روی کا شکار ہے اور سردی کی شدت میں مزید اضافہ بھی ہوگیا ہے۔

واضح رہے کہ دھند کا سلسلہ مزید 2 یوم جاری رہ سکتا ہے۔

دھند کیا ہے؟

اسموگ،  فوگ یعنی دھند اوراسموگ یعنی دھویں سے ماخوذ ایک اصطلاح ہے، یہ ایک فضائی آلودگی ہے، جو انسان کی دیکھنے کی صلاحیت کو کم کردیتی ہے۔

ماہرین کے مطابق موسم گرما جانے کے ساتھ ہی جب دھند بنتی ہے تو یہ فضا میں پہلے سے موجود آلودگی کے ساتھ مل کر اسموگ بنا دیتی ہے۔

اس دھویں میں کاربن مونو آکسائیڈ، نائٹروجن آکسائیڈ، میتھین اور کاربن ڈائی آکسائیڈ جیسے زہریلے مواد شامل ہوتے ہیں۔

دسمبر1952ء میں لندن میں فضائی آلودگی کی لہر کو’گریٹ اسموگ‘ کے نام سے یاد کیا جاتا ہے، لندن میں آلودہ دھند کی وجہ سے12ہزار سے زائد افراد اپنی زندگی کی بازی ہار گئے تھے۔