امریکی محکمہ خزانہ نے عوام کو کرپٹو کرنسی کے خطرات سے آگاہ کرنے کے لیے مہم کا آغاز کردیا ہے۔

امریکی محکمہ خزانہ کی اہم عہدے دارنیلی لیانگ نے ذرایع ابلاغ کو دیے گئے انٹرویو میں کہا ہے کہ ہم عوام میں کرپٹو کرنسی کے بارے میں شعور اجاگر کرنے کے لیے 20 مختلف اداروں کے ساتھ مل کر مہم کا آغاز کر رہے ہیں۔

اس مہم کے تحت امریکی عوام کو اس بابت آگاہی دی جائے گی کہ کرپٹو کرنسی میں سرمایہ کاری سے انہیں کس نوعیت کے خطرات لاحق ہیں۔

جب کہ عوام کو سرمایہ کاری کے اس غیرمحفوظ نظام سے پیسہ نکال کرمعاشی دھارے کے مرکزی مالیاتی نظام میں داخل کرنے کی ترغیب بھی دی جائے گی۔

 یہ بھی پڑھیں: امریکا میں بٹ کوائن پر شکنجہ سخت، قانون منظور

اس معلوماتی مہم کے لیے وزرات خزانہ کا مالیاتی تعلیمی کمیشن مواد کی تیاری کے ساتھ ساتھ ایونٹس کا انعقاد بھی کرے گا۔

لیانگ کا مزید کہنا تھا کہ ہم اب پہلے سے زیادہ اس بارے میں سن رہے ہیں کہ کاروباری افراد اورسرمایہ کاروں کے علاوہ اب عام لوگ بھی خطرات کا سوچے بنا ڈیجیٹل اثاثے خرید رہے ہیں۔

انہوں نے کہا کہ ’مجھے لگتا ہے کہ ہمیں لوگوں میں ڈیجیٹل اثاثوں کے نقصانات کے بارے میں زیادہ سے زیادہ شعور اجاگر کرنے اورتعلیم دینے کی ضرورت ہے۔‘

یاد رہے کہ یوکرین اور روس میں جاری جنگ کے بعد امریکا کی جانب سے کرپٹو کرنسی کے خلاف مہم اور اسے کنٹرول کرنے کی کوششوں میں تیزی آگئی ہے۔

گزشتہ روزہی امریکی صدرجوبائیڈن نے ایک ایگزیکٹو آرڈر پردستخط کیے ہیں، جس کے بعد وزارت خزانہ اوردیگر وفاقی اداروں نے کرپٹو کرنسی کی مانیٹرنگ اور اسے قانونی دائرے میں لانے کے لیے کام شروع کردیا ہے۔