روس کیخلاف آسٹریلیا نے یوکرین کو مہلک ہتھیار دینے کا اعلان کردیا ہے۔ دوسری جانب روسی صدارتی محل کریملن کا کہنا ہے کہ یوکرین سے بات چیت کےنتائج پر کچھ کہنا قبلِ از وقت ہوگا۔ 

غیر ملکی خبر رساں ادارے کے مطابق آسٹریلیا کی جانب سے یوکرین کو 50 ملین ڈالر مالیت کے میزائل، گولہ بارود اور دیگر ملٹری ہارڈ ویئر فراہم کرنے کا اعلان کیا ہے۔

 آسٹریلوی وزیرِ اعظم اسکاٹ موریسن کا اس موقع پر کہنا ہے کہ یوکرینی صدر نے کہا تھا کہ انہیں یوکرین سے انخلاءکے لیے پرواز نہیں اسکے برعکس  لڑنے کے لیے اسلحہ چاہیے۔ اس ضمن میں یوکرینی صدر کی اپیل پر آسٹریلوی حکومت نے یوکرین کو اسلحہ فراہم کرنے پر اتفاق کیا ہے۔

آسٹریلوی وزیرِ اعظم کا مزید کہنا تھا کہ یوکرین کو نیٹو کے ذریعے 50 ملین ڈالر مالیت کی مہلک، غیر مہلک دفاعی امداد فراہم کریں گے جبکہ یوکرین کو فراہم کیے جانے والے اسلحے میں سے اکثریت مہلک ہتھیاروں کی ہو گی۔

علاوہ ازیں یوکرین اور روس کی مابین جاری جنگ کے تناظر میں کریملن کا کہنا ہے کہ یوکرین سے بات چیت کےنتائج پر کچھ کہنا قبلِ از وقت ہوگا۔ یوکرین میں قوم پرست عناصر شہریوں کو بطور انسانی ڈھال استعمال کررہے ہیں۔ روسی فوجیں یوکرین میں سول انفرا اسٹرکچر، گھروں کونشانہ نہیں بنا رہیں۔

 یاد رہے، کریملن نے روس یوکرین بات چیت کیلئے ثالثی کا امکان رد کردیا ہے۔ یوکرین روس کے وفود براہِ راست بات چیت کررہے ہیں۔ کریملن نے یوکرین پر کلسٹر اور ویکیوم بم استعمال کرنے کے الزامات مسترد کردیے ہیں۔