عالمی تنہائی کے سیاہ بادل چھٹ گئے۔ فیفا کی نامزد نارملائزیشن کمیٹی اور حکومت کے درمیان مذاکرات کامیاب ہوگئے ہیں۔ جس کے بعد لاہور میں فٹبال ہیڈکوارٹرز نارملائزیشن کمیٹی کے سپرد کر دیا گیا۔

تفصیلات کے مطابق پاکستان فٹبال پر فیفا کی جانب سے عائد پابندیاں جلد ختم ہوجائیں گی۔ مذاکرات کی کامیابی میں وفاقی وزیر ڈاکٹر فہمیدہ مرزا نے اہم کردار ادا کیا اور وزیراعظم عمران خان کی خصوصی ہدایت پر مسئلے کا حل تلاش کیا گیا۔

اس تناظر میں اشفاق گروپ نے نارملائزیشن کمیٹی کو فٹبال ہاؤس سے بے دخل کر دیا تھا اور بیرونی مداخلت پر فیفا نے پاکستان فٹبال کو معطل کردیا تھا۔

چیئرمین نارملائزیشن کمیٹی ہارون ملک کا کہنا ہے کہ پاکستان فٹبال کی عالمی تنہائی کا برا دور جلد اپنے اختتام کو پہنچے گا۔ پی ایف این کے تحت صاف شفاف انتخابات کا انعقاد یقینی بنائیں گے۔ عالمی ایونٹس میں پاکستانی ٹیموں کی شرکت ممکن بنائیں گے۔ سارے معاملے میں صبر و تحمل اور معاونت پر فیفا کے شکرگزار ہیں۔ مشکل حالات میں نارملائزیشن کمیٹی کے ساتھ کھڑی رہنے والی فٹبال برادری کے شکرگزار ہیں۔

یاد رہے، بین الاقوامی قوانین کی خلاف ورزی کے سبب پاکستان کی رکنیت فیفا نے معطل کردی تھی۔