خیبرپختونخوا فوڈ سیفٹی اتھارٹی کی جانب سے کی گئی کارروائیاں میں جعلی مشروبات برآمد کرلیے گئے ہیں۔

تفصیلات کے مطابق کارروائی ہری پور اور سوات میں کی گئی، ہری پور میں چھاپے کے دوران گودام سے 1500 لیٹر سے زائد جعلی مشروبات برآمد کیا گیا۔

 فوڈ سیفٹی اتھارٹی نے بتایا کہ ملٹی نیشنل برانڈز کے نام پر تیار جعلی مشروبات کو مارکیٹ میں سپلائی کیا جارہا تھا کہ انہیں موقع پر دھر لیا گیا۔

فوڈ سیفٹی اتھارٹی کا کہنا ہے کہ سوات کی تحصیل بابوزئی میں بھی جعلی مشروبات کی فیکٹری پر چھاپا مارا گیا، یونٹ میں مضر صحت کیمکلز کی آمیزش سے جعلی مشروبات تیار کیے جارہے تھے۔

فوڈ سیفٹی اتھارٹی نے بتایا کہ یونٹ سے 2 ہزار لیٹر سے زائد جعلی مشروبات برآمد کرکے یونٹ سیل کردیا گیا۔

 فوڈ سیفٹی اتھارٹی نے مزید بتایا کہ یونٹ سے پیکنگ میٹریل بھی ضبط کرلیے گئے ہیں۔

خیال رہے کہ کچھ روز قبل ہی خیبرپختونخوا فوڈ سیفٹی اتھارٹی کی جانب سے جعلی گڑ تیار کرنے والے یونٹ کے خلاف کی گئی کارروائی کے نتیجے  میں 1400 کلو چینی، خراب گڑ اور مضر رنگ  ضبط کرلیا گیا تھا۔

ڈی جی فوڈ سیفٹی اتھارٹی شاہ رخ علی خان کا کہنا ہے کہ یونٹ میں گنے کے بجائے چینی، خراب گڑ اور مضر صحت رنگوں کی مدد سے گڑ تیار کیا جارہا تھا۔

ڈی جی فوڈ سیفٹی اتھارٹی کے مطابق مارکیٹ میں صاف اور محفوظ خوراک کی فراہمی یقینی بنا رہے ہیں، عوام بھی ملاوٹ مافیا کے خلاف شکایات ہمارے ٹال فری نمبر پر درج کرائیں۔