وزیراعلیٰ پنجاب سردار عثمان بزدار نے کہا ہے کہ اپوزیشن جماعتوں کو موجودہ حالات میں ہوش کے ناخن لینے چاہئیں۔

وزیراعلیٰ عثمان بزدار سے صوبائی وزیر اوقاف پیر سید سعید الحسن کی ملاقات ہوئی جس میں سیاسی صورتحال، ترقیاتی منصوبوں اور چیف منسٹر ڈسٹرکٹ ڈویلپمنٹ پیکیج پر گفتگو کی گئی۔

عثمان بزدار نے کہا کہ عوام وزیراعظم عمران خان کے شانہ بشانہ کھڑے ہیں، وطن عزیز کے مسائل کا حل اتحاد و اتفاق میں مضمر ہے۔

انہوں نے کہا کہ پاک دھرتی کی مٹی ہم سب سے بھائی چارے، مذہبی رواداری اور بین المذاہب ہم آہنگی کا تقاضا کرتی ہے، سب کو وطن کا یہ قرض اتارنے کیلئے اپنا فرض ادا کرنا ہوگا۔

وزیراعلیٰ پنجاب کا کہنا ہے کہ سیاست کیلئے آگے بہت وقت ہے، اپوزیشن جماعتوں کو موجودہ حالات میں ہوش کے ناخن لینے چاہئیں، اپوزیشن او آئی سی وزرائے خارجہ کے اجلاس کے موقع پر بھی منفی سیاست سے باز نہیں آئی۔

عثمان بزدار نے مزید کہا کہ اپوزیشن رہنماؤں نے اس اہم ترین موقع پر بھی پوائنٹ اسکورنگ کی کوشش کی، اپوزیشن بند گلی میں پھنس چکی ہے، یہ تحریک عدم اعتماد کے بعد بھی روتی رہے گی۔

دوسری جانب صوبائی وزیر پیر سید سعید الحسن نے ملاقات میں وزیراعلیٰ عثمان بزدار کے سیاسی اور ترقیاتی ویژن کو سراہا۔

پیر سید سعید الحسن نے گفتگو کرتے ہوئے کہا کہ وزیراعظم عمران خان حقیقی لیڈر ہیں، وزیراعلیٰ عثمان بزدار کے ساتھ کھڑے ہیں اور ساتھ کھڑے رہیں گے۔