عدالت نے آئندہ سماعت پر نیب سے ریفرنس کے مرکزی ملزم روشن قناصرو پر الزام سے متعلق رپورٹ طلب کرلی۔ 

تفصیلات کے مطابق کراچی کی احتساب عدالت میں محکمہ ثقافت وسیاحت میں کروڑوں روپے کی کرپشن کے ریفرنس میں مرکزی ملزم سابق ایم ڈی سندھ ٹورزم روشن قناصرو کی درخواست ضمانت پرکیس کی سماعت ہوئی۔

نیب کے پراسیکیوٹر نے عدالت کو دلائل میں بتایا کہ روشن قناصرو کی سپریم کورٹ سے بھی درخواست ضمانت مسترد ہوچکی ہے۔ ریفرنس کے شریک ملزم شہنشاہ اور روشن قناصرو پر ایک ہی الزام ہے۔

پراسیکیوٹر نے کہا کہ شہنشاہ حسین پر 26 لاکھ روپے کا الزم ہے اس نے 26لاکھ زرضمانت میں رکھ کے ضمانت لی ہے۔

نیب کی پراسیکیوٹر کا کہنا تھا کہ سندھ میں کلچر کی ترویج کا کام ان کو سونپا گیا تھا لیکن کسی علاقے کام نہیں کیا۔ ملزمان نے قومی خزانے کو 4 کروڑ 85 لاکھ روپے سے زائد کا نقصان پہنچایا۔

عدالت نے ریمارکس دیے کہ روشن قناصرو پر جو الزم ہے اتنی رقم جمع کرائی جائے جس پر وکیل روشن قاصرو نے کہا کہ روشن قناصرو پر جو الزام ہے وہ رقم دینے کو تیار ہے، ضمانت دی جائے۔

سماعت کے دوران نیب کے پراسیکوٹر کے دلائل مکمل ہونے کے بعد احتساب عدالت نے آئندہ سماعت پر نیب سے ریفرنس کے مرکزی ملزم روشن قناصرو پر الزام سے متعلق رپورٹ طلب کرتے ہوئے کیس کی سماعت 6 اپریل تک ملتوی کر دی۔

عدالت نے ریمارکس دیے کہ آئندہ سماعت پر بتایا جائے کے روشن قناصرو پر کتنی کرپشن کا الزم ہے۔