مسلم لیگ (ق) کے سربراہ چوہدری شجاعت حسین نے کہا ہے کہ ہمیں سیاسی مفادات سے بالاتر ہوکر قومی یکجہتی کا مظاہرہ کرنا ہوگا۔

مسلم لیگ (ق) کے سربراہ چوہدری شجاعت حسین نے یوم پاکستان کے موقع پر پیغام دیتے ہوئے کہا کہ انسانیت پر لاحق انتہا پسندی اور غربت کے خطرات پر قابو پانا ہوگا۔

چوہدری شجاعت نے کہا کہ ذاتی، سیاسی و جماعتی مفادات سے بالاتر ہو کر قومی یکجہتی کا مظاہرہ کرنا ہوگا، بانی پاکستان قائداعظم محمد علی جناح اور مصور پاکستان علامہ اقبال کو خراج عقیدت پیش کرتے ہیں۔

دوسری جانب اسپیکر پنجاب اسمبلی چوہدری پرویزالہٰی نے کہا کہ مسلح افواج اور دفاعی اداروں کی ملکی بقا کی خاطر قربانیوں کو کبھی فراموش نہیں کیا جا سکتا۔

انہوں نے کہا کہ پاکستان کا بچہ بچہ آزادی کی جدوجہد میں کشمیری بھائیوں کے شانہ بشانہ کھڑا ہے، جس جذبے کے ساتھ 23 مارچ 1940ء کو قرارداد پاکستان منظور ہوئی تھی اسی جذبے کو آج دوبارہ تازہ کرنے کی ضرورت ہے۔

چوہدری پرویزالہٰی نے مزید کہا کہ یوم پاکستان قوم کیلئے انتہائی اہمیت کا حامل دن ہے، پاکستان کی مسلح افواج اور ملکی دفاعی و قانون نافذ کرنے والے اداروں کی قربانیوں کو فراموش نہیں جاسکتا۔

اس موقع پر وفاقی وزیر برائے آبی وسائل مونس الہٰی نے کہا کہ آج کا دن ہندو اکثریت کے ظلم و جبر اور غلامی کی زنجیروں سے چھٹکارا حاصل کرنے کا دن ہے۔

مونس الہٰی نے کہا کہ مقبوضہ کشمیر کے بہن بھائیوں سے اظہار یکجہتی کرتے ہیں، کشمیری بھائی عرصہ دراز سے غیر انسانی لاک ڈاؤن میں زندگی بسر کررہے ہیں۔