زندگی ناقابلِ بھروسہ ہے۔ اس کا اعتبار لا یعنی ہے۔ بہت کچھ انسان سوچتا ہے تاہم، موت کا وقت متعین ہے اور موت کے باعث اس کے تمام منصو بے دھرے کے دھرے رہ جاتے ہیں۔  ایسا ہی کچھ آنجہانی آسٹریلوی لیجنڈ شین وارن کے ساتھ ہوا۔لیگ اسپنر کے انتقال کی خبر دنیائے کرکٹ پر غم کا پہاڑ بن کر ٹوٹی۔

اس موقع پر شائقین کرکٹ کا شین وارن کی آخری خواہشات کا جاننا ان کے لیے غم کا باعث بنا ہوا ہے۔ مرنے سے 4 دن قبل اپنےچاہنے والوں کو انھوں نے اپنے زندگی کے حوالے سے آگاہ کرتے ہوئے بتایا تھا کہ وہ اب کچھ لائف گولز کو حاصل کرنے کو ارادہ رکھتے ہیں۔

شین وارن وزن کم کرنا چاہتے تھے

سماجی رابطے کی ویب سائٹ پر لگنے والی یہ پوسٹ مرحوم کی آخری پوسٹ ثابت ہوئی جس میں وہ کہہ رہے ہیں کہ میں خود کو دوبارہ صحت کی بہترین حالت میں دیکھنا چاہتا ہوں جس کے لئے ورزش  بھی کررہا ہوں۔ آج اس ورزش کا دسواں روز ہے۔ امید ہے چند دنوں میں، میں پہلے کی طرح فٹ اور اسمارٹ ہوجاؤں گا۔

انھوں نے اپنی ماضی کی کچھ تصاویر بھی شئیر کیں جن میں وہ کافی فٹ تھے۔ واضح رہے کہ شین وارن تھائی لینڈ میں واقع اپنے وِلا میں چھٹیاں منانے گئے تھے جہاں سے 4 مارچ کو مردہ حالت میں پائے گئے۔ انتقال کے وقت ان کی عمر 52 سال تھی۔ شین وارن کی چند دن پہلے کی جانے والی یہ پوسٹ سوشل میڈیا پر تیزی سے وائرل ہورہی ہے۔