وفاقی وزیر مواصلات مراد سعید نے کہا ہے کہ بلاول کو خاتون اول کے بارے میں نازیبا گفتگو پر شرم آنی چاہیے۔

تفصیلات کے مطابق مراد سعید نے بلاول بھٹو کی کانفرنس پر ردِ عمل دیتے ہوئے کہا کہ عوام آپ کا اصل چہرہ جان چکے ہیں، پرچی کی بنیاد پر سیاست میں آنے والے کو فرزند زرداری پکاریں تو گالی لگتا ہے۔

انہوں نے کہا کہ بلاول بھٹو نے انتہائی گری ہوئی حرکت کی، بلاول کو خاتون اول کے بارے میں نازیبا گفتگو پر شرم آنی چاہیے، بلاول بھٹو آج بوکھلائے لگ رہے تھے، کانپیں ٹانگ چکی ہیں۔

ان کا کہنا تھا کہ گلگت بلتستان الیکشن میں ہم نے 2 تہائی اکثریت حاصل کی، زرداری ہی نشانہ ہے کیونکہ آپ نے ملک کا بیڑہ غرق کیا ہے، بلاول بھٹو پرچی چیئرمین ہیں، حادثاتی طور پر سیاست میں آئے۔

مراد سعید نے بلاول بھٹو کو چیلنج کیا کہ کسی بھی حلقے میں میرا مقابلہ کریں، انہوں نے کہا کہ ہم کرپشن کا پوچھتے ہیں تو خواتین سے متعلق گفتگو شروع کر دیتے ہیں ، آصف زرداری کو پہلے مسٹر 10 پرسنٹ پھر مسٹر 50 پرسنٹ کہا گیا۔

انہوں نے کہا کہ نیو یارک ٹائمز کی رپورٹ کے مطابق انہوں نے 200 ملین ڈالر کا غبن کیا، سندھ میں انسان اور جانور ایک ہی تالاب سے پانی پیتے ہیں، خوراک نہ ملنے سے ہزاروں اموات ہوتی ہیں۔

 وفاقی وزیر مواصلات مراد سعید کا مزید کہنا تھا کہ سندھ میں اربوں روپے کی گندم چوہے کھا جاتے ہیں، قائد کے شہر کو کچرے کا ڈھیر بنا دیا گیا، انہوں نے سندھ کا پورا انفراسٹرکچر تباہ کر دیا، بتاتے نہیں سندھ کا پیسہ کہاں گیا۔