پاکستانی خوبرو اداکارہ و ماڈل مونالیزا المعروف سارا لورین نے کہا ہے کہ اگر انہیں اپنے شوبز کیریئر کے لئے بھارت اور پاکستان میں سے کسی ایک کا انتخاب کرنا پڑے تو وہ بھارت کا انتخاب کریں گی۔

رپورٹ کے مطابق سارا لورین نے حال ہی میں ’مومناز مکس پلیٹ‘ نامی شو میں انکشاف کیا ہے کہ اگر انہیں اپنی اداکاری کے کیرئیر میں اگر پاکستان یا بھارت میں سے کسی ایک کا انتخاب کرنا پڑے تو وہ بھارت کا انتخاب کریں گی کیونکہ مواد تیار کرنے کے حوالے سے بھارت پاکستان سے بہت آگے ہے۔

ساتھ ہی اداکارہ نے وضاحت کی کہ مگر زندگی گزارنے کے طریقوں پر وہ پاکستان کو فوقیت دیں گی، کیوں کہ بطور پاکستانی ہم کہیں بھی کسی اور ملک میں اس طرح زندگی نہیں گزار سکتے جس طرح اپنے ملک میں گزار سکتے ہیں۔

سارہ نے بالی ووڈ میں اپنے کام کے تجربے کا ذکر کرتے ہوئے کہا کہ ان کا نام مونا لیزا ہے اور شناختی کارڈ سمیت تمام دستاویزات میں یہی نام درج ہے تاہم انہوں نے بالی ووڈ میں انٹری کے وقت اپنا نام مونا لیزا سے سارہ لورین رکھا اور جب بھارتی مشہور اداکار سلمان خان نے ان کا نام سارہ لورین لیا تو انہیں بےحد اچھا لگا اور انہیں تب یقین ہوا کہ ان کا نام تبدیل ہو چکا ہے۔

سارا لورین نے بتایا کہ گزشتہ کچھ عرصے سے وہ مختلف مسائل کی وجہ سے ڈپریشن کا شکار رہی تھیں، جس وجہ سے وہ شوبز میں دکھائی نہیں دیں مگر اب انہوں نے ’عشرت: میڈ ان چائنا‘ فلم کے ذریعے واپسی کی ہے۔

انہوں نے بتایا کہ ڈپریشن کے وقت انہوں نے باقاعدگی کے ساتھ نماز پڑھی اور اہتمام کے ساتھ اعتکاف میں بیٹھیں اور وہ 12 سال کی عمر سے اعتکاف میں بیٹھتی آ رہی ہیں مگر بعض لوگ انہیں مسیحی سمجھتے ہیں۔

سارا لورین نے کہا کہ ان کے چہرے کے خدوخال چینی لوگوں سے بھی ملتے ہیں، اسی وجہ سے انہوں نے ’عشرت: میڈ ان چائنا‘ میں چینی لڑکی کا کردار بھی ادا کیا۔

واضح رہے کہ سارا لورین نے مونا لیزا کے نام سے پاکستانی ڈراموں سے کیریئر کا آغاز کیا، جس کے فوری بعد وہ ماڈلنگ بھی کرتی دکھائی دیں انہوں نے اپنے کیرئیر کا آغاز 13 سے 14 سال کی عمر میں کیا تھا جب انہیں والد کی موت کے بعد والدہ کے ہمراہ کویت چھوڑ کر پاکستان آنا پڑا۔