آج کے جدید دور میں موبائل فون ہر ایک کی ضروت بن چکا ہے لیکن اس کے استعمال سے جہاں لوگوں کو فائدہ ہو رہا ہے وہیں نقصان بھی ہو رہا ہے ،اسی طرح نئی نسل بھی اس ڈیوائس کو استعمال کرنے کا ہنر خوب جانتی ہے جس کی وجہ سے وہ کئی خطرات کا بھی شکار ہو سکتی ہے۔

جب آپ موبائل میں کوئی ویب سائٹ کھولتے ہیں تو ایک آپشن آتا ہے جس میں ویب سائٹ آپ سے عمر، نام، ٹیلی فون نمبر اور پتہ مانگتی ہے اور یہ زیادہ تر گیمز کھیلتے ہوئے یا کسی ویب سائٹ پر جاتے ہوئے ہوتا ہے لہٰذا بچوں کو اس بات سے ضرور آگاہ کریں کہ ذاتی معلومات کسی اجنبی سے شئیر نہیں کرنی چاہئیے۔

اس کے علاوہ جب بچے موبائل فون استعمال کرتے ہیں تو ہر قسم کی ویب سائٹ تک رسائی حاصل کر سکتے ہیں، کیا آپ بھی چاہتے ہیں کہ بچوں کو وہی کچھ دکھائیں جو آپ چاہتے ہیں؟ تو ایسا ممکن ہے۔

انٹرنیٹ کو کسی نا کسی براؤزر کے ذریعے ہی چلایا جا سکتا ہے جیسے کہ گوگل کروم، انٹرنیٹ ایکسپلورر اور سفاری، ان براؤزرز کے ذریعے جب کوئی بھی انٹرنیٹ چلاتا ہے تو ہر قسم کا مواد سامنے آتا ہے، چاہے وہ آپ کے لئے فائدے مند ہو یا نہیں مگر آپ تک رسائی ممکن ہو جاتی ہے۔

براؤزر میں پیرنٹل کنٹرول میں جا کر آپ کئی چیزوں پر پابندی لگا سکتے ہیں جس سے بہت سے غیر ضروری اور خطرناک ویب سائٹس تک رسائی ممکن نہیں ہوگی، اس کے لئے کانٹینٹ فلٹر کے ذریعے مختلف طرح سے چیزوں کو روک سکتے ہیں۔

اس لئے جب بھی آپ کا بچہ آن لائن گیم کھیل رہا ہو یا پھر ویڈیوز دیکھ رہا ہو تو ضرور دیکھیں کہ اس میں کون کون شامل ہے اور اسی طرح ویڈیو دیکھ رہا ہے تو اس میں کیا میسج دیا جا رہا ہے۔

اس بات کا ضرور خیال رکھیں کہ بچے نے موبائل استعمال کیا ہے تو اس کے بعد آپ چیک کریں کہ کہیں کوئی غیر ضروری ایپ تو ڈاؤنلوڈ نہیں کرلی کیونکہ کچھ ایپس ایسی بھی ہوتی ہیں جو کہ آپ کی جاسوسی کر رہی ہوتی ہیں۔

بڑی مشکلات سے بچنے کے لئے والدین کو احتیاط کرنی چاہیئے اور بچوں کی نگرانی کرنی چاہیئے جو کہ آج کے دور میں بہت ضروری ہے۔