صدر آزاد جموں و کشمیر نے کہا ہے کہ پاکستان ایسوسی ایشن دبئی اپنے لوگوں کی ہر ممکن خدمت کرنے میں اپنی تاریخ رکھتی ہے۔

صدر آزاد جموں وکشمیر بیرسٹر سلطان محمود چوہدری نے دبئی میں پاکستان ایسوسی ایشن دبئی کے زیر اہتمام چلنے والے فری اسپتال کا دورہ کیا جہاں اُن کا صدر چنار ونگ امجد کبیر،ہیڈ آف پی ایم سی ڈاکٹر نسیم، ڈائریکٹر سپورٹس پاکستان ایسوسی ایشن ابوبکر امتیاز،ڈاکٹر شفقت محمود، راجہ محمد عاشق خان،ڈاکٹر شاہد زمان جائنٹ سیکرٹری، زاہد حسین ہیڈ آف کلچر،ہیڈ آف ایجوکیشن پاک ایسوسی ایشن دبئی داؤد شریف اور دیگر نے استقبال کیا۔

اس موقع پر تقریب سے اپنے خطاب میں صدر آزاد جموں وکشمیر بیرسٹر سلطان محمود چوہدری نے کہا کہ پاکستان ایسویسی ایشن کے زیر اہتمام اس طرح کے پروجیکٹس کا قیام ہمارے لئے باعث فخرہے۔

انہوں نے کہا کہ پاکستان ایسوسی ایشن دبئی اپنے لوگوں کی ہر ممکن خدمت کرنے میں اپنی تاریخ رکھتی ہے۔ پاکستان ایسوسی ایشن دبئی کے ذمہ داران کو مبارکبادپیش کرتا ہوں کہ جنھوں اپنی مدد آپ کے تحت کمیونٹی کی سپورٹ کے ساتھ اتنا بڑا ادارہ بنایا ہے۔

صدر آزاد جموں وکشمیر کا کہنا تھا کہ مجھے آج یہ دیکھ کر بڑی خوشی ہو رہی ہے کہ پاکستان ایسوسی ایشن دبئی نے اپنی مدد آپ کے تحت یہاں پر مقیم کشمیریوں اور پاکستانیوں کومفت طبی سہولیات فراہم کرنے کیلئے یہ اسپتال تعمیر کیا ہے جس میں یہاں پر مقیم کمیونٹی کے افراد کو ہر طرح کی بہترین طبی سہولیات میسر ہیں۔

سلطان محمود چوہدری کا یہ بھی کہنا تھا کہ پاکستان ایسوسی ایشن دبئی یہاں متحدہ عرب امارات میں اوورسیز میں اپنی مدد آپ کے تحت چلنے والاواحد ادارہ ہے جہاں پرمستحق پاکستانیوں اور کشمیریوں کی مدد کی جاتی ہے۔

صدر آزاد جموں وکشمیر بیرسٹر سلطان محمود چوہدری کا مزید کہنا تھا کہ اس طرح کے پروجیکٹس سے بیرون ملک مقیم پاکستانیوں اور کشمیریوں کو جدید طبی سہولتوں کی فراہمی کسی بڑی نعمت سے کم نہیں اور اس ادارے کے قیام سے متحدہ عرب امارات میں مقیم اوورسیز پاکستانی اور کشمیری کمیونٹی کی مشکلات کو کم کرنے میں مددملے گی۔

 اس موقع پر جائنٹ سیکرٹری شاہد زمان نے پاکستان ایسوسی ایشن دبئی کے حوالے سے صدر ریاست کو بریفنگ دیتے ہوئے کہا کہ پاکستان ایسوسی دبئی نے صحت عامہ کو دیکھتے ہوئے پی ایم سی کا قیام عمل لایا تاکہ مستحق افراد کی خدمات کی جاسکے۔